Guddiga Doorashada madaxtinimada Soomaaliya ayaa maanta billaabay qabashada araajida mas'uuliyiinta daneeynaya inay isu soo taagaan qabashada  jagada ugu sarreysa  dalka oo ah madaxweynaha Jamhuuriyadda Federaalka ee Soomaaliya.

Qabshada codsiyada ayaa waxa ay socon doontaa ilaa Lixda bishan Sebtember.

Shalay ayey xubnaha Golaha Baarlamaanka Soomaaliya  ansixiyeen shuruudaha looga baahan yahay inay soo buuxiyaan mas'uuliyiinta u tartamaya madaxtinimada Soomaaliya.

Shuruudaha looga baahan yahay musharaxiinta ayaa ah sidan:

• Inuu Soomaali yahay.
• Inuu caafimaad qabo.
• Inuu afartan sano ka weyn yahay.
• In xukun danbi maxkamadeed aanu lahayn.
• In codsiga madaxtinimada uu soo gudbiyo.
• Inuu ku soo lifaaqo 10 kun oo Dollar oo diiwaan gelin ah.
• Inuu soo gudbiyo barnaamijkiisa siyaasadeed.
• Inuu heysto warqadda aqoonsiga in uu Soomaali yahay ama baasaboor Soomaali ah.
• In labaatan xildhibaan ay u soo saxiixaan in uu musharax yahay qofka tartamaya.
• In halkii xildhibaan uu u saxiixi karo saddex murashax oo keliya.

Doorashada Madaxweynaha Soomaaliya ayaa lagu wadaa in la qabto 10 bishan Sebtember.