Guddoomiyaha gobolka Banaadir ahna Duqa magaalada Muqdisho mudane Maxamuud Axmed Nuur (Tarsan) ayaa maanta ka hadlay dib u dhaca ku yimid bakhtiyeenasiibka ay ganacsatadu u galayaan bacadlaha suuqa degmada Xamarweyna.

Gudoomiye Tarsan oo maanta shirjaraa’id ku qabtay xafiiskiisa magaalada Muqdisho ayaa tilmaamay bakhtiyeenasiibkii loo qaban lahaa ganacsatada oo ay ku dooran lahaayeen nambarada dukaamada bacadlaha suuqa Xamarweyne uu dib u dhac ku yimid sababo farsamo halkii loo qoondeeyey in maalinnimada berri ah bakhtiyeenasiibkaasi loo qabto ganacsatadana loo dhigay 18ka bishan oo uu dhici doono bakhtiyeenasiibka.

Waxa uu rajeeyey Gudoomiyaha gobolka Banaadir ahna duqa magaalada Muqdisho Mudane Maxamuud Axmed Nuur Tarsan in bakhtiyeenasiibkaasi loo qabanayo ganacsatada uu ku dhaco jawi wanaagsan islamarkaana ay ganacsatadu si cadaalad ah ku doortaan nambarka goobta ganacsi ee ay heli doonaan.

Bacadlaha degmada Xamarweyne ee gobolka Banaadir ayaa waxaa maamulka gobolka Banaadir uu ku sameeyey dib u dhis taasi oo qeyb ka ah qorshaha lagu soo nooleynayo bilicda Caasimadda laguna soo celinayo adeegyadii guud.