Ra'iisul-wasaaraha Jamhuuriyadda Soomaaliya mudane Cabdi Faarax Shirdoon (Saacid) ayaa maanta kulan la qaatay Ururada Bulshada Rayidka iyo ururka Haweenka Qaranka isagoona sheegay in ay diyaar u yihiin sidii ay wadashaqeyn buuxda u dhaxmari laheyd.

Kulankan uu maanta Ra’iisul wasaaraha Jamhuuriyadda Federaalka Soomaaliya kula qaatay xafiiskiisa Ururrada Bulshada Rayidka iyo ururka Haweenka Qaranka Soomaaliyeed, ayey u jeeddadiisa aheyd sidii ay u soo gudbin lahaayeen taageerada iyo horumarka ay dowladda la garab taagan yihiin, waxaana kulanka uu ahaa mid ay dib dibed joog ka aheyd warbaahinta.

Markii uu gabagaboobay kulankaasi ayaa waxaa warbaahinta la hadashay Qadro Bulsho oo ku haleysay magaca dhammaan ururradii ka qeyb galay kulanka, waxa ayna sheegtay in qaabiladdii ugu horeysay uu Ra’iisul wasaaruhu siiyay Haweenka Soomaaliyeed, waxa ay intaa raacisay in iyaga qudhooda ay u gudbiyeen taageeradooda iyo sidii loo dhammeystiri lahaa xaquuqdooda, isla markaana ay dalbadeen in Xukuumadda uu soo dhisi doono ay ka helaan 30%.

Sidoo kale lataliyaha dhinaca Warfaafinta ahna afhayeenka dowladda Soomaaliya Cabdi Xaaji Goobdoon ayaa warfidiyeennada u sheegay in Haweenkii uu maanta kulanka la qaatay R/wasaaraha u so gudbiyeen Hambalyo iyo taageero waxa uuna xusay in R/wasaare Cabdi Faarax Shirdoon ay weydiiyeen su’aallo la xiriirra qorshaha uu ka damacsan yahay dhismaha hay’adaha dowladda iyo sidii loo dardar galin lahaa baxnaaninta Bulshada Rayidka ah.

Afhayeenka dowladda ayaa hoosta ka xariiiqay in Haweenka ay soo jeediyeen xuska sannad guurada 40-aad ee markii la qoray Luuqaddeena Hodanka ah ee Soomaaliga, taasina uu soo dhaweeyey Ra’iisul wasaaraha isla markaana uu ballan qaaday in la xoojin doono arrintaasi oo manaahijta Waxbarashada ee dalka lagu kobcin doono.

Waa markii ugu horeysay ee uu kulan la qaato Cabdi Faarax Shirdoon “Saacid” R/wasaaraha Jamhuuriyadda Soomaaliya tan iyo markii loo magcaabay wasiirka koowaad ee dowladda Soomaaliya iyadoo dhawaan la rajeynayo in uu soo dhiso Xukuumaddiisa dalka ka howlgalli doono afarta sanno ee soo socota.