Taliyaha Ciidammada Xoogga Dalka Soomaaliyeed Sarreeye Gaas Cabdulqaadir Sheekh Cali Diini ayaa tilmaamay in qaadista cunaqabateyna hubka ee saarneyd Soomaaliya ay muhiimad gaar ah u leedahay howlgalka dalka ka soconayo ee looga xoreynayo Maleeshiyada Al-Qaeda.

Taliyaha oo saakay ka qeybgalayey barnaamijka Kulanka Jimcaha oo todobaadkiiba maanta oo kale ka baxa Radio Muqdisho iyo Telefishinka Qaranka Soomaaliyeed ayaa xusay in cunaqabateynta hubka oo laga qaado Soomaaliya ay muhiimad u leedahay howlgalka soconaya iyo dib u dhiska Ciidammada Qalabka Sida ee Soomaaliya .

Mar uu taliyaha Ciidammada Xoogga Dalka Soomaaliyeed Sareeye Gaas C/qaadir Sheekh Cali Diini howlgalka ka soconaya gudaha dalka ayuu tilmaamay in howlgalku uu marayo meel wanaagsan islamarkaana dhowaan lasoo afjari doono gebi ahaanba Maleeshiyada kooxda Al-Shabaab.

Ugu dambeyntii Taliyaha Ciidammada Xoogga Dalka Soomaaliyeed Sareeye Gaas C/qaadir Sheekh Cali Diini ayaa Ciidammada Xoogga Dalka Soomaaliyeed iyo kuwa AMISOM waxa uu ugu hambalyeeyey guullaha isdaba jooga ah ee ay kasoo hooynayaan howlgalka lagu xureynayo maleeshiyada Al-Qaeda.