Xafladan oo aheyd casho sharaf laguna qabtay mid ka mid ah hoteelada ugu weyn Magaalada Geneva ee dalka Switzerland ayaa ujeedadeeda waxa ay aheyd taageerada in Soomaaliya ay ka baxday nidaamkii KMG ahaa, Doorashadii xalaasha aheyd ee madaxweynaha jamhuuriyada , gudoomiyaha Baarlamaanka, iyo magacaabista R/wasaaraha Xukuumada cusub ayaa waxaa ka soo qeybgalay safiiro ka socday dowladaha Turkiga, Jabuuti, Uganda, iyo madax kale oo tirsan dowladda Switzerland, iyo marti sharaf kale .

Xafladan oo ay si wada jir ah uga soo qeybgaleen jaaliyadaha Soomaaliyeed ee ku nool dalka Switzerlandayaa waxaa soo abaabulay jaaliyada Soomaaliyeed ee magaalada Geneva gaar ahaan C/raxmaan Sh. Xuseen Goleey, iyo marwadiisa Khadiijo Maxamuud Muuke Faäza mascuud Sh. Ibrahim yare, Maxamed Axmed Cali (katimba) iyo Dr. Axmed Cali Eybakar.

Madaxweynaha jamhuuriyada Federalka ah ee Soomaaliya Prof Xasan Sh. Maxamuud oo qadka telfoonka kula hadlay ka qeybgalayaashii xaflada ayaa waxa uu si weyn ugu dheeraaday sida ay lagama maarmaan u tahay in qurba joogta Soomaaliyeed door wax ku ool ah ka qaataan dib u dhiska dalkooda gaar ahaan sidii ay uga faa’iideysna lahaayeen fursadaha banaan ee la xiriira maalgashiga iyo ka qeybqaadashada barnaamijyada horumarineed ee dalka, isaga oo si gaar ah carabka ugu adkeeyey Soomaali dal kasta oo ay dhalasho ka qaadato in ay weli tahay Soomaali dalkuna uu u baahan yahay, si looga faa’iideysto aqoonta iyo khibradaha wanaagsan ee laga dhexlay dalalka shisheeye.

Xafladan ayaa waxaa khudbado qiimo badan ka jeediyey madax ka socday safaaradaha dowladaha aan walaalaha nahay ee jabuuti, Turkiga iyo madax kale iyaga oo si weyna u muujiyey dareenkooda farxadeed ee ku aadan in maanta Soomaaliya ay tahay dowlad rasmi ah.

Ambasadoor Yuusuf Ismaaciil Bari-bari oo ah ergayga Soomaaliya u joogo Magaalada Geneva oo gunaanadkii xaflada ka hadlay ayaa u mahadceliyey dhamaan xubnihii soo abaabulay xafladan iyo sida quruxda badan leh ee looga soo qeybgalay, waxa uuna ku celceliyey in qof waliba looga baahan yahay in uu door macno leh ka qaato taariikhda qormeysa ee Soomaaliya.

Hoos Ka Daawo Sawirrada Xafladda.