Ra'iisul-wasaaraha Soomaaliya ayaa maanta ka qaybgalay dibadbax lagu taageerayay xukuumadda isla markaana Baarlamaanka looga dalbanayay in ay kalsooni siiyaan wasiirrada ayaa maanta lagu qabtay garoonka kubadda cagta Banaadir ee magaalada Muqdisho.

Dibadbaxan oo ahaa mid ballaaran oo lagu taageerayay Xukuumadda 10, wasiir ka kooban ee uu dhawaan Ra’iisul wasaaraha Xukuumadda Federaalka Soomaaliya magcaabay ayaa waxaa ka qeyb galay mas’uuliyiin uu ugu sarreeyo Ra’iisul wasaaraha dalka, wasiirrada cusub ee aan wali helin kalsoonida, Guddoomiyaha gobolka Banaadir, Ururrada Bulshada Qaarkood, iyo kummanaan shacab ah, oo isugu soo baxay garoonka ciyaaraha ee Banaadir.

Fannaaniinta Hobollada Waaberi ayaa ku soo bandhiggay halka uu dibadbaxa ka socday Heeso lagu taageerayo Ra’iisul wasaaraha iyo Xukuumadda, waxaana dadkii dibed baxan ka qeyb galay dhammaantood ka muuqanayay sida ay ugu faraxsan yihiin magcaabista golaha wasiirrada,

Mudane Maxamuud Axmed Nuur “Tarsan” Guddoomiyaha gobolka Banaadir oo ku hadlayey codka shacabka reer Muqdisho ayaa sheegay in ay ka codsanayaan Mudanayaasha Barlamaanka Soomaaliya in ay tixgaliyaan dareenka shacabka Soomaaliyeed ee ku aadan helitaanka waxqabadka Xukuumadda Cusub.

Gabagabada Dibadbaxan ayuu khudbad u jeediyay R/wasaaraha dalka Dr. Cabdi Faarax Shirdoon “Saacid”, waxa uuna tilmaamay in ay ka go’antahay in ay ka qaadaan Soomaaliya halka ay taallo, isla markaana ay akhristeen dareenka ummadda Soomaaliya, rajo wanaagsanna uu ka qabo samatabixinta dalka sanadaha soo socda.

Waa dibadbaxii ugu weynaa tan iyo markii lagu dhaawaaqay Wasiirrada 10,ka ah ee xukuumadda Soomaaliya ee ka dhaca magaalada Muqdisho, kaasi oo ay isugu soo baxeen kummaan shacabka caasimadda ku dhaqan oo doonaya in ay muujiyeen taageerada iyo rabbitaanka wasiirrada kooban ee Xukuumadda.