Guddoomiyaha Baarlamaanka Federaalka Soomaaliya ayaa ku amray xubnaha ka tirsan Xildhibaannada Baarlamaanka ee ku maqan dalka Dibaddiisa iney si deg deg ah ugusoo xaroodaan gudaha dalka si ay uga qeyb qaataan howlaha Xildhibaannada.

Gudoomiyaha Baarlamaanka Federaalka Soomaaliya Mudane Maxamed Cismaan Jawaari oo maanta ka hadlay kadib gebagebada kulan ay Mudanayaasha Baarlamaanku ku yeesheen xaruntooda golaha shacabka ee magaalada Muqdisho ayaa tilmaamay in howlaha shaqo ee Xildhibaannada Baarlamaanka ay ka socdaan si dar dar leh xilgan.

Gudoomiye Jawaari ayaa yiri “waxaad arkeysaan in howlaha shaqo ee Xildhibaannada ay ku socdaan si dar darleh oo ah sida ay shacbiga Soomaaliyeed inoo wakiisheen sidaasi darted si ay Xildhibaannadu u gutaan waajibka loo igmaday waxaan ku amrayaa iney si deg deg ah ku yimaadaan gudaha Dalka xildhibaannada dibadda ku maqan”

Gudoomiyaha Baarlamaanka oo hadalkiisa sii wata ayaa xusay in Xildhibaannada ku maqan dalka dibaddiisa aysan u dhaaran iney dibadaha wareegaan balse waxa ay u dhaarteen ay tahay iney shacabkooda u adeegaan waana kuwa ay metelayaan hadii aysan imaanna laga tashan doonno.

Go’aankan kasoo baxay Gudoonka Baarlamaanka Federaalka Soomaaliya ayaa ah go’aan uu ku doonayo in lagu dardar geliyo howlaha Baarlamaanka taasi oo si loo helo ay lagama maarmaan tahay in Xildhibaannada dibadda ku maqan ay dalka kusoo xaroodaan.