Wasiirka Wasaaradda Warfaafinta iyo Isgaarsiinta Xukuumadda Soomaaliya Mudane C/laahi Ciilmooge Xirsi oo isagu dhowaan xilka si rasmi ah ula wareegay ayaa sheegay in Wasaaraddu ay dib usoo nooleyneyso Dalxiiskii uu dalku lahaa.

Wasiirka oo maanta ka qeybgalayey barnaamijka Kulanka Jimcaha oo todobaadkiiba maanta oo kale ka baxa Telefishinka Qaranka iyo Radio Muqdisho ayaa ugu horeyn waxa uu ka hadlay faa’iidadii uu dalxiisku u lahaa dhaqaalaha dalka waxaana uu xusay in dhaqaalaha dalka goobaha ugu badan oo uu kasoo galo dalxiiska si taasi loo helana ay tahay lagama maarmaan in dalxiiska dib loosoo nooleeyo.

“Dhaqaalaha dalka meelaha ugu badan ee uu kasoo galo dalxiiska ayaa ka mid ahaa si aan taas u helno oo aan usoo ceshano dhaqaalahaasi islamarkaana uu wax soo saarka noogu kordho waalagama maarmaan inaan Dalxiiskii dib usoo ceshano waanna soo celineynaa insha Allah, dadkuna haka faa’ideystaan”ayuu yiri Wasiirka Wasaaradda Warfaafinta iyo Isgaarsiinta Xukuumadda Soomaaliya Mudane C/laahi Ciilmooge Xirsi.

Ugu dambeyntii Wasiirka Wasaaradda Warfaafinta yo Isgaarsiinta Xukuumadda Soomaaliya Mudane C/laahi Ciilmooge Xirsi ayaa ugu baaqay Shacabka Soomaaliyeed iney ka faa’ideystaan fursadda maanta la heysto si dalka uu uga gudbo dhibaatada mudada dheer uu kusoo jiray ayaga oo ka tusaale qaadanaya dalalkii horey dagaallada ugasoo kasbaday.