Kullan ay ku yeesheen Magaalada Gaalkacyo ee Xarunta gobolka Mudug Madaxweyne ku xiggeenka Maamulka Galmudug State C/samad Nuur Guuleed iyo Golaha Wasiirada Galmudug ayaa waxa ay isku raaceen in Galmudug ay ka qeyb gasho shirka ka furmaya Magaalada Istanbul ee dalka Turkiga kaasi oo uu horey kaga soo horjeestay Madaxweyne Max’ed Axmed Caalin.

Madaxweyne ku xiggeenka Maamulka Galmudug State C/samad Nuur Guuleed oo la hadlay Idaacadda Shabelle ayaa waxa uu sheegay in la isku raacay in shirkaasi ay ka qeyb gasho Galmudug islamarkaana ay wada go’aan sadeen 3-da gole ee Galmudug ee barlamanka iyo Wasiirada Maamulkaasi, wuxuuna intaasi ku daray inay suuro gali waysay in lagu wargaliyo ka qeyb galka shirkaasi Madaxweyne Caalin.

Guddoomiyaha barlamanka Maamulka Galmudug State Xasan Max’ed Hayl oo isna la hadlay Idaacadda Shabelle ayaa waxa uu sheegay in golaha barlamanka Galmudug uu taageersan yahay ka qeyb galka shirka Istanbul islamarkaana ay taageersan yihiin go’aankii ay qaateen golaha Wasiirada sida uu hadalka u dhigay, waxaana uu dhinaca kale xusay in Madaxweyne Caalin markii uu kasoo horjeesanayay ka qeyb galka shirka Istanbul aan wax wada tashi ah la yeelan Mas’uuliyiinta kale ee Galmudug.

Arrintaani ayaa sii hurinaysa khilaafkii ka dhaxeeyay Mas’uuliyiin Maamulka Galmudug State oo horey ugu muransanaa xilliga ay dhacayso Doorashada Madaxtinimo ee Maamulkaasi.