Ra'iisul-wasaaraha Jamhuuriyadda Federaalka Soomaaliya Cadbi Faarax Shirdoon iyo wafdigii labada gole ee uu hogaaminaayey ayaa maanta gaaray magaalada Cadaado ee xarunta maamul-goboleedka Ximan iyo Xeeb.

Ra'iisul-wasaaraha iyo wafdigiisa ayaa waxa si diirran ugu soo dhoweeyey gegida dayaaradaha magaalada Cadaado madaxda sare ee maamulka Ximan iyo Xeeb iyo dadweyne aad u fara badan oo isugu soo baxay soo dhoweynta ra'iisul-wasaaraha.

Ra'iisul-wasaaraha iyo wafdigiisa ayaa waxaa loo gelbiyey xarunta madaxtooyada ee maamulka Ximan iyo Xeeb ee magaalada Cadaado, ayadoona hareeraha waddada ay dhoobnaayeen dadweyne fara badan oo lulayey calanka Soomaaliya, kuna dhawaaqayey erayo ay ku soo dhoweynayeen wafdiga dowladda Soomaaliya.

Booqashada ra'iisul-wasaaraha iyo wafdigiisa ayaa waxa ay qayb ka tahay dadaallo dowladda Soomaaliya ay ku wanaajimeyso xiriirka ay la leedahay gobollada iyo is-maamullada ka jira gobollada dhexe ee dalka Soomaaliya.