Wafdi uu hoggaaminayo R/wasaaraha dalka ayaa gaaray dagmada Dhuusamareeb ee xarunta gobolka Galgaduud waxaana halkaasi wafdiga kusoo dhaweeyay mas’uuliyiinta gobolka iyo shacab.

Mudane Cabdi Faarax Shirdoon “Saacid” ayaa waxaa socdaalkiisa ku wehliyay wasiirka arrimaha gudaha iyo amaanka Qaranka, wasiirka difaaca dalka, guddoomiye ku xigeenka labaad ee baarlamanka iyo mas’uuliyiin kale oo ka tirsan dowladda.

Markii ay ka dageen garoonka R/wasaaraha iyo xubnaha la socdo ayaa waxaa garoonka diyaaradaha ee dagmada dhuusamareeb ku soo dhaweeyay mas’uuliyiinta maamulka gobolka iyo boqolaal dad weyne ah kuwaas oo ruxayay caleemo qoyan.

Mudane Cabdi Faarax Shirdoon ayaa haatan kulan kula leh xarunta dagmada boqolaal shacab isagoona jeedinayo khudbad uu uga warmayo xaalada dalka iyo waxyaabihii ay ku guuleysatay xukuumadda mudadii ay jirtay.