Xaaladda deegaannadii ay shalay la wareegeen ciidammada ASWJ ayaa saakay deggan, iyadoo ciidammada ASWJ ay degmada Ceelbuur ka wadaan baaritaanno iyo howlgallo ammaanka lagu xoojinayo.

Guddoomiya Fulinta Culuma’udiinka Ahlu Sunna Waljameeca Sheekha Maxamed Yuusuf Xeefoow ayaa Radio Muqdisho u sharraxay xaaladda degmada Ceelbuur iyo sida maanta xaalku yahay, waxa uuna sheegay in xaaladda degmada ay deggan tahay isla markaana shacabka ay muujinayaan sida ay ugu faraxsan yihiin in dulleysigii Shabaab laga dul qaado.

Sidoo kale waxa uu tilmaamay in ciidammada ASWJ ay wadaan baaritaanno iyaga oo kaashanaya ciidammada Itoobiya, isagoo intaa raaciyay in baaritaannada ay bar bar socdaan howlgallo ammaanka lagu xoojinayo, si loo illaaliyo amniga shacabka degmada Ceelbuur.

“Khawaarijta jab xooggan ayaa ku dhacay, hadda waxaan ku macneyn karaa waa ay bur burreen, laakin waxaa hubaal ah in aan sidaa uga hari doonin oo uu holwgalku socon doono inta la sifeeyo guud ahaa Soomaaliya” ayuu yiri guddoomiyaha fulinta ASWJ.

Dhinac kale Sheekh Maxamed Yuusuf Xeefoow ayaa hoosta ka xariiqay in shacabka ku nool guud ahaan gobolka Galgaduud ay u bislaadeen nabadda iyo dowladnimada isla markaana aysan oggollaan doonin Gumeysigii Shabaab in uu mar kale dib ugu soo laabto, “aniga waan ku boorrinayaa shacabka in ay ka shaqeeyaan midnimada Soomaaliya iyo nabadgalada deegaanka. ayuu ku soo gunnaanuday.