Madaxweynaha Jamhuuriyadda Federaalka Soomaaliya mudane Xassan Sheekh Maxamuud ayaa habeenimadii xalay gaaray magaalo-madaxda dalka Qatar ee Dooxa oo ka furmayo shir-madaxeedka waddamada ku jira Ururka Jaamacadda Carabta.

Madaxweynaha ayaa waxaa garoonka dayuuradaha ku soo dhoweeyay Amiirka dalka Qatar Amir Hamad Bin Khalifah Al Thaani, iyo dhaxal sugaha Sheekh Tamim Bin Hamad Bin Khalifah Al Thani.

Shirkan ayaa waxaa diiradda lagu saari doonaa dhibaatada ka taagan dalka Suuriya, sidii loo horumarin lahaa Ururka Jaamacadda Carabta iyo arimaha Falastiin.

Kulankan ayaa wuxuu noqonayaa kii ugu horeeyay oo noociisa ah ee uu Madaxweyne Xassan ka qeyb galo tan iyo markii uu xilka la wareegay.

Madaxweynaha ayaa sidoo kale kulamo la qaadan doona Madax kala duwan ee Carbeed si uu ugala xaajoodo arrimo ay ka mid yihiin xiirirka diblomaasiyadeed iyo iskaashi ku aadan xagga horumarka.

Madaxweynaha ayaa wuxuu sare u qaaday uuna wanaajiyay xiriirka Soomaaliya ay la leedahay dalalka Caalamka taasna waxey ka mid tahay aragtidiisa siyaasadeed ee ku wajahan arimaha dibadda.

daawo sawirrada