Madaxweynaha  Soomaaliya mudane Sheekh Shariif Sheekh Axmed ayaa maanta ka qeybgalay munaasabad loogu magac daray isdhexgalka Bulshada oo lagu qabtay xarunta degmada Xamar Jajab ee G/Banaadir.

Munaasabadan oo uu soo qabanqaabiyay maamulka degmada Xamar Jajab isla markaana ay ka qeybgaleen bulshada degmadaasi ayaa waxaa goob joog ka ahaa Madaxweynaha Jamhuuriyada Sheekh Shariif Sh. Axmed iyo guddoomiyaha G/Banaadir Ahna Duqa magaalada Muqdisho Maxamuud Axmed Nuur Tarsan.

Madaxweyne Sh. Shariif ayaa halkaasi ka jeediyay hadallo aad u qiimo badan oo taabanayay dhinacyo kaladuwan, wuxuuna madaxweynuhu kula dardaarmay shacabka in ay u astaagaan sidii ay ilaashan lahaayeen amaanka iyo qarannimadooda, islamarkaana ay muujiyaan isku duubni si looga baxo dhibaatada dalka ka jirtay.

Sidoo kale madaxweyne Shariif ayaa soo hadalqaaday amaanka Muqdisho isagoo tilmaamay in Ciidamada Qalabka sida ay wax weyn ka qabteen sugidda amaanka wuxuuna xusay in dowladdu ay ahmiyadda siineyso xaqiijinta amaanka dalka ayna ciidamadu sii wadi doonaan howlgallada ay dalka kaga xoreynayaan kooxda Alqaacidda.

Munaasabadan ayaa qeyb ka ah dadaallada ay dowladdu ku wanaajineyso xiriirka ay la leedahay bulshada Iyadoo barnaamijkan loogu magacdaray isdhexgalka bulshada hore loogu qabtay degmooyin ka mid ah G/Banaadir.