Wasiirka arrimaha gudaha iyo amniga qaranka Mudane Cabdisamad Macallim Maxamuud oo maanta dib ugu soo laabtay dalka ayaa ka warbixiyay safarro shaqo uu ku tagay wadamo dhowr ah, isaga oo shaaciyay in jaaliyadaha ku nool dalalka Ingiriiska iyo Canada ay si weyn uga qeybqaadan doonaan dib u dhiska dalka.

Wasiirka ayaa tilmaamay in uu siyaabo kala duwan ula kulmay jaaliyadaha Soomaaliyeed ee ku nool dalalkaasi islamrkaasna uu warbixinno ka siiyay xaaladaha amniga iyo siyaasadda dalka waxa uuna intaasi ku daray in jaaliyadaha ku nool dalalka Britain iyo Canada ay qoondeenayaan inay lacago farabadan ku bixiyaan dib u dhiska waddooyinka magaalada Muqdisho, iskuulladka iyo saldhigyada ciidamada.

Wasiirka arrimaha gudaha iyo amniga qaranka oo dhanka kale wax laga weydiiyay maamulgoboleedyada ka abuurmaya gudaha dalka ayaa ugu baaqay dadka doonaya inay sameeystaan maamullada looga baahanyahay inay waafajiyaan nidaam sharci ah islamrkaasna ay dowladdu dhiirigelinayso kuna tagaereeyso arrintaasi.

Wasiirka arrimaha gudaha iyo amniga qaranka ayaa markii uu ka soo degay garoonka waxaa ku soo dhaweeyay xubno ka tirsan golaha wasiirrada oo uu ka mid ahaa Wasiiru dowlaha wasaaradda dastuurka iyo arrimaha federaalka iyo dib u heshiisiinta mudane Xasan Maxamed Xasan dheere, xubnaha ururka haweenka qaranka Soomaaliyeed iyo saraakiil kale oo ka tirsan dowladda.