Shir ay maanta yeesheen Golaha Wasiiradda oo uu shirguddoominayey Ku-simaha ra’iisul-wasaaraha Soomaaliya Ahna wasiirka ganacsigga iyo warshadaha Cabdiwahaab Ugaas Xuseen  ayaa looga hadlay arrimo dhowr ah oo ay ka mid yihiin amniga, dastuurka, iyo howlgalada Ciidamada Xoogga Dalka.

Ugu horeyntii wasiirka gaashaandhigga Xuseen Carab Ciise ayaa warbixin ka bixiyay guulaha ay gobollada ka gaareen Ciidamada Xoogga Dalka Soomaaliyeed iyo Kuwa AMISOM islamarkaana tilmaamay in waqti dhow ay ciidamada gacanta ku dhigi doonaan Magaalada Kismaayo.

Wuxuuna wasiirku intaa ku daray in degmada Afgooye laga furay Maxkamada Ciidanka islamarkaana lagu maxkamadeyn doono cidii Shacabka dambi ka gasha, sidoo kalena sheegay in mar dhow mushaaraadka ciidanka la heli doono islamarkaana ilaa 600 oo askari la Soo tababarayo.

Wasiiru-dowlaha wasaaradda arrimaha gudaha iyo amniga qaranka ayaa asagana sheegay in dhammaanba goobihii laga saaray xoogaggii  Al-Shabaab dhowaan la wada geyn doono ciidamo boolis ah oo sugi doona ammaanka.

Waxaana sidoo kale Golaha warbixin siiyay wasiiru-dowlaha dastuurka, Howlaha ku saabsan dastuurka dalka iyo meesha ay mareyso, wuxuuna Golaha u sheegay in Odoyaasha Dhaqanka ay si wanaagsan Howlahooda u socdaan islamarkaana ay ku howlan yihiin soo xulista ergooyinkii ansixin lahaa dastuurka.

Ugu dambeyntii shirka golaha wasiirada ayaa waxa lagu go'aamiyey la ilaaliyo hantida qaranka oo aan lagu xadgudbin, wuxuuna goluhu ammaan u soo jeediyey ciidamada qalabka sida ee Soomaaliyeed iyo kuwa Midowga Afrika ee AMISOM guulihii ugu dambeeyey ee ay ka gaareen dagaallada ay kula jiraan xoogagga Al-Shabaab.