Wafdi uu hogaaminayo Madaxweynaha Jamhuuriyadda Soomaaliya Mudane Sheekh Shariif Sheekh Axmed ayaa gelinkii dambe ee maanta dalka ugusoo laabtay ayadoo Madaxweynaha iyo wafdigiisa si heer sare ah loogu soo dhaweeyey garoonka diyaaradaha Aadan Cadde ee magaalada Muqdisho.

Wafdiga Madaxweyne Sheekh Shariif Sheekh Axmed ayaa waxaa garoonka diyaaradaha Aadan Cadde kusoo dhaweeyey mas’uuliyiin kakala tirsan labada gole ee Dowladda oo uu hogaaminayey Kusimaha Ra’isulwasaaraha Dalka ahna Wasiirka Wasaaradda Ganacsiga iyo Warshadaha Xukuumadda Soomaaliya Mudane C/wahaab Ugaas Xuseen Ugaas Khaliif,Saraakiisha Ciidammada iyo qeybaha kala duwan ee Bulshada.

Madaxweynaha Jamhuuriyadda Soomaaliya Mudane Sheekh Shariif Sheekh Axmed ayaa dalka kaga maqnaa socdaal qaatay Shan cisho ayadoo mudadaasina uu Madaxweynuhu socdaal shaqo ku tagay dalalka Brundi,Sudan iyo Rwanda halkaasi oo kula soo kulmay Madaxweynayaasha dalalkaasi waxaana socdaalka Madaxweynaha uu qeyb ka yahay xoojinta xiriirka iyo wadashaqeynta ay Dowladda Soomaaliya la leedahay dalalka caalamka.