Wasiirka Arrimaha Gudaha iyo Amniga Qaranka ee Dowladda KMG mudane Cabdisamad Macallim Maxamuud ayaa maanta dib ugu soo laabtay dalka isagoo faah faahin ka bixiyay kulamo uu dalka dibaddiisa kula soo yeeshay mas’uuliyiin ka tirsan beesha caalamka isagoo isla maanta ka qeybgalay kulanka magaalada Muqdisho uga socda Odayaasha dhaqanka Soomaaliyeed.

Mudane Cabdisamad  ayaa sidoo kale ka warbixiyey kulankii ay dhowaan asaga iyo wafdigii Dowladda KMG ee safarkiisa ku weheliyey  magaalada London ee dalka Ingiriiska kula soo yeesheen mas'uuliyiin  ka socotay Somaliland.

Wasiirka oo hadalkiisa sii wata ayaa guud ahaan kulankaasi ka dhacay duleedka magaalada London ku tilmaamay inuu ahaa mid guul ku soo dhammaaday, tusaalena uu noqday in caalamku ogaado in dadka Soomaaliyeed ay ayagu arrimahooda xallisan karaan.

Wasiirka ayaa dhinaca kale tagay goobta ay Odayaasha dhaqanka Soomaaliyeed uu shirka uga socdo isagoona sheegay in looga baahanyahay in ay soo dadajiyaan soo xulista ergada ansaxineysa dastuurka dalka.