Munasabada lagu furayey Maxjarka baaritaanka caafimaadka xoolaha ee gobolka Shabeelladda hoose oo maanta ka dhacday xarunta Maxjarkaasi ayaa waxaa ka qeyb galay Madaxweynaha Soomaaaliya Sheekh Shariif Sheekh Axmed oo ay wahliyeen R/wasaare ku xigeenka ahna wasiirka ganacsiga iyo warshadaha, wasiirka arrrimaha gudaha, taliyaha ciidanka booliska, guddoomiyaha gobolka Banaadir iyo xubno ka mid ah Saraakiisha ciidanka.

Agaasimaha waaxda xanaanada Xoolaha dhirta iyo daaqa ee wasaaradda xanaanda Xoolaha Dr C/raxmaan Nuur ayaa ugu horeyn warbixin ka siiyay Madaxweynaha marxaladaha dib loogu dhisay maxjarka iyo faa’idooyinka uu u leeyaha xoolaha dalka.

Sidoo kale agaasimaha maxjarka Iimaan Maxamed ayaa sheegay in dhismaha Maxajarka uu soo socday ilaa labo sano ayna ku baxaday lacag dhan Saddax milyan iyo saddax kun oo dollar balse ay aqoonsadeen maxjarka wadamo badan oo loo iibgayn doono xoolaha Soomaaliya taasina ay tahay guul u soo hoyatay ganacsatada maal galisay maxjarka.

R/wasaare ku xigeenka ahna wasiirka ganacsiga iyo warshadaha C/wahaab Ugaas Xuseen Ugaas Khaliif oo hadlay ka jeediyay munasabadaasi ayaa ka hadlay Faa’iidada uu maxjarka uu yeelanayo xoola dhaqatada iyo ganacsatada xoolaha Dhoofisa, asogoona amaan u jeediyay ganacsatada isku howshay dhismaha Maxjarka.

Madaxweynaha Soomaaliya Sheekh Shariif Sheekh Axmed oo gabgabadii xaflada furitaanka Maxjarka ka hadlay ayaa xusay in dowladda Soomaaliya ay tix galinayso ganacsiga xorta ah, waxa uuna kula dardaarmay ganacsatada in ay sara u qaadaan ganacsiga si uu u kobco dhaqaalaha wadanka.