Shirka Wadamada ku mideysan kooxda xiriirka Caalamiga ah ee ICG oo looga hadlayo Xaaladda Soomaaliya ayaa maanta si rasmi ah uga furmay magaalada Rome ee dalka Talyaaniga iyadoo ay kulankaasi ka qeybgaleen Mas’uuliyiin ka tirsan Dowladda KMG ah.

Shirka oo ah mid si heer sare ah loo soo qabanqaabiyay ayaa waxaa marti gelinaysa dowladda Talyaaniga iyadoo kulankaasina ay ka qeybgalayaan madax iyo Wakiillo ka socda Dowladaha daneeya arrimaha Soomaaliya.

Kulanka ay waxaa dowladda Fedraalka KMG ah ee Soomaaliya uga qeyb galaya R/wasaaraha xukuumadda C/weli Maxamed Cali Gaas, Afheyeenka Baarlamanka Shariif Xasan, wasiirka Gaashaandhiga Xuseen Carab Ciise iyo Mas’uuliyiin kale.

Wasiirka Difaaca dalka Mudane Xuseen Carab Ciise oo u waramayay Radio Muqdisho ayaa sheegay in inta uu socdo kulan ay mas’uuliyiinta ka socoto dowladda ay warbixin ka siinayaan madaxda ka kasocta wadamada daneeya arrimaha Soomaaliya gaar ahaan horumarrada laga gaaray dhinacyada amniga ,siyaasadda iyo qorsheyaasha lagu horumarinayo guud ahaan dalka.