Qarax sababay Dhimashada Wasiirkii hore ee Wasaaradda Ganacsiga Xukuumaddii hore ee ra'iisul-wasaare Maxamed Cabdullaahi (Farmaajo) isla markaasna ahaa  xildhibaan ka tirsan barlamaanka Soomaaliya marxuum Maxamuud Cabdi Ibraahim “Garweyne” ayaa maanta ka dhacay meel ku dhow Bacadlaha Xamarweyne, iyadoona ay isla qaraxaasi ku dhaawacmeen shan qofood oo rayid ah.

Gaariga Xildhibaan “Garweyne” ayaa lagu soo xiray waxyaabaha qarxa iyadoo dhimashadiisana ay shaaciyeen Saraakiisha Booliska Soomaaliya waxaana sidoo kale la ogeyn cidda ku lug leh falkaasi.

Ciidamada ayaa baaritaanno ka sameeyay deegaannada ku xeeran goobta uu qaraxu ka dhacay waxaana muddo kooban hakad la geliyay isu socodkii dadka iyo gaadiidka.

Maxamuud Garweyne ayaa xilal kala duwan ka soo qabtay Xukuumadihii dalka soo maray mudadii uu xukunka hayay Madaxweyne Shariif waxa uuna soo noqday Wasiirkii Arrimaha Bani’aadanninimada, Wasiirkii Caafimaadka, ku simihii Wasiirkii Hidaha iyo Tacliinta sare isagoo haatan ahaa mudane ka tirsan Baarlamanka Soomaaliya.