Gudoomiyahha gobolka Banaadir ayaa ka codsaday shacabka reer Muqdisho in ay gacan ka geeystaan qabsoomidda shirka lagu ansixinayo Dastuurka cusub ee dalka.

Maxamuud Axmed Nuur Tarsan ayaa ugu baaqay guddoomiyayaasha degmooyinka iyo ganacsatada reer Muqdisho in ay martigeliyaan ergada ansixineysa qabyo qoraalka Dastuurka maadama la waayay dhaqaalihii ay ballan qaadeen beesha caalamka.

Mudane Tarsan oo hadalkiisa sii wata ayaa intaa ku daray in Muqdisho lagu dhisayo Jamhuuriyaddii Labaad ee Soomaaliya sidaasi darteedna ay lagama maarnaan tahay in reer Muqdisho ay martigeliyaan ergada iyagoo isku duuban maamul, shacab iyo ganacsatadaba si aan marmarsiiyo loogu helin dib u dhigista qabyo qoraalka Dastuurka.

Sidoo kale Tarsan ayaa hootsa ka xariiqay in lagama maarmaan ay tahay in wax laga qabto ammaanka Muqdisho isagoo xusay in aan dad lagu martigelin karin meel aan aheyn ammaan, isagoo rajo wanaagsan ka muujiyay in maamulka G/banaadir oo kaashanaya shacabka Muqdisho ay dhexda u xiranayaan oo ay martigelin doonaan ergada ansixineysa Dastuurka muddo 15 maalmood ah.

Hadalka guddoomiyaha ayaa loo arkaa haddii uu hirghelo mid meesha ka saaraya ku tiirsanaanta gacanta shisheeye isla markaana sare u qaadeysa sharafta. Iyo waddaniyadda shacabka Muqdisho, oo iyagu nasiib u helay in ay ku noolaadaan caasimadda oo ka mid ah astaamaha Qaranka.