Sheekh Mukhtaar Roobow Cali (Abuu-Mansuur), oo maanta ka hadlay muxaadaro ka
dhacday degmada Baydhabo ee gobolka Bay, ayaa ku baaqay in la xoojiyo dagaallada
lagula jiro dowladda Soomaaliya iyo ciidammada AMISOM, isagoo shacabka ugu
baaqay inay dagaallada ka qaybqaataan.
“Mujaahidiinta,
waxaan ugu baaqayaa inay xoojiyaan dagaallada lagula jiro dowladda Soomaaliya
iyo ciidanka AMISOM, shacabkuna waa inay ka qaybqaataan sidii cadowgaas dalka
looga saari lahaa,” ayuu yiri Sheekh Mukhtaar oo la hadlayay boqolaal
qof.
Hoggaamiyahan,
oo ka mid ahaa saraakiishii ka shaqeeyay in ururkii Xisbul Islaam uu ku biiro
Xarrakatul Shabaab, ayaa sheegay in
dagaallada lagula jiro dowladda iyo AMISOM, ay yihiin kuwo lagu doonayo in
qaybaha ay Muqdisho kaga sugan yihiin looga saaro si loogu soo rogo xukunka
sharciga Islaamka.
“Xarrakatul
Shabaab, waxaa ka go’an inay dalka kusoo rogto maamul Islaami ah, dadka waa inay
garab istaagaan mujaahidiinta,” ayuu yiri Sheekh Abuu-Mansuur, oo ciidammada
AMISOM ku tilmaamay cadow kusoo duulay Soomaaliya.
Gobollada Koonfureed
ee Soomaaliya iyo inta badan Muqdisho ayaa waxaa ka taliya Xarrakatul Shabaab,
iyadoo kusoo rogtay deegaannadaan ismaamulka shareecada Islaamka, waxayna
fulisay deegaannadaas xukunno xad ah oo lagu fuliyay dad lagu eedeeyay inay
dambiyo galeen.