Wararka ka imaanaya Deegaanadii ay maalmihii dambe ku dagaalamayeen Ciidamada dowladda Soomaaliya oo gacan ka helaya Ciidamada dowladda Ithopiya iyo dhanka kale kuwa Ururka Al Shabaab ayaa waxa ay ku waramayaan in xaaladdu saakay ay tahay mid degan iyadoo deegaano hoostaga Magaalada Garbaahaareey ee Gobolka Gedo oo lagu Magacaabo Mey Kooreebee oo ay shalay ku dagaalameen Ciidamada dowladda iyo Kuwa Ithopiya oo isgarabsanaya iyo shabaabka ku sugan qaybo kamida Gobolka Gedo

Sida dadka deegaanka ay uxaqiijiyen idaacadda Shabelle waxaa halkaasi saaka laga dareemayaa dhaq dhaqaaqyo Ciidan iyadoo saacad kasto la filan karo dagaalo markale ka qarxa deegaanno hoostaga Degmada Garbaahaarey ee Gobolka Gedo.

Barre Cabdi Barre oo ka mida Saraakiisha Ciidamada dowladda ee ku sugan gobolka Gedo oo la hadlay Idaacadda Shabelle ee Magaalada Muqdishoa ayaa waxa uu faah faahin ka bixiyay dagaaladii shalay ka dhacay deegaanno ka tirsan Gobolka Gedo isagoo shaaca ka qaaday in dagaaladaasi ay ka dhasheen khasaaro isugu Jira dhimasho iyo dhaawac isagoona Carabka ku dhuftay in dhankooda ay ka gaareeyoodeen labo askari dhinaca kalana Tilmaamay in shabaab khasaaro ba’an ay ku gaarsiiyeen dagaaladii shalay.

Shalay ayey ahayd markii dagaalo Culus ay Ciidamada dowladda Soomaaliya iyo kuwa Ithopiya oo isku dhinaca iyo Ururka Al Shabaab ee ka soo horjeeda ay ka dheceen deegaano hoostaga Degmada Garbahaareey ee Gobolka Gedo waxaana Saraakiisha Ciidanada dowladda ay ku goodiyeen in ay cagta marin doonaan degmooyinka ay Al Shabaab ka maamulayaan Gobolka Gedo