Kulan muhiim u ah dib u ammaanka iyo dib u dhiska Ciidammada Qalabka Sida ee Soomaaliya ayaa lagu qabtay magaalada Ankara ee dalka Turkiga ayadoo kulankaasi oo ay soo qaban qaabisay Dowladda aynu walaalaha nahay ee Turkiga ayaa waxaa ka qeybgalay wufuud ka kala socotay Soomaaliya,urur goboleedka IGAD,Midowga Afrika,Midowga Yurub,QM iyo Dowladda shirkan soo qaban qaabisay ee Turkiga.

Shirkan waxaa dhanka Soomaaliya uga qeybgalay wufdi uu hogaaminayo Wasiirka Gaashaandhigga Soomaaliya Mudane C/xakiin Maxamuud Xaaji Fiqi ayadoo wafdigaasina ay ka mid yihiin Taliyaha Ciidammada Xoogga Dalka Soomaaliyeed Sareeye Gaas C/qaadir Sheekh Cali Diini, Wasiir Kuxigeenka Wasaaradda Arrimaha Dibadda Mudane Jamaal Baroow iyo xubno kale.

Shirkan oo socday mudo hal maalin ah oo aheyd 18-January ayaa waxaa inta uu socday lasoo hordhigay oo ay ka qeybgalayaashana ay isla qaada dhigeen qorshe ay wadajir usoo diyaariyeen dowladaha Soomaaliya iyo Turkiga ayadoo qorshahaasina uu la xiriiro in Seddexda sano ee soo socota Soomaaliya loo dhiso islamarkaana loo qalabeeyo Ciidammo awood u leh iney hantaan guud ahaanba amniga Soomaaliya.

Safiirka Soomaaliya ee Dalka Turkiga Mudane Maxamed Mursal Sheekh C/raxmaan oo markii uu kulankaasi soo gebageboobay wareysi siiyey Radio Muqdisho ayaa sheegay in dhinacyada shirka ka qeybgalay ay si aad ah u taageereen qorshahan islamarkaana ay Dowladda Turkigu ballan qaaday iney hirgelinta qorshahan ku bixin doonto Toban Milyan oo dollar halka ay sidoo kale dowladdo ay ka mid tahay Imaaraadka Carabta iyana Ballan qaadeen iney dhaqaale ku deeqi doonaan sidii qorshahan loo hirgelin lahaa.

“qorshahan shirka lagu ansixiyey wuxuu quseeyaa Ciidammada Xoogga Dalka iyo Booliiska Soomaaliyeed ayaga ayaa lagu sameyn doonaa dib u dhis waayo sida aad hada la socotaan Soomaaliya wey ka baxday hada KMG,qorshahana kaliya kuma koobna tababarista Ciidammada ee sidoo kale wuxuu quseeyaa in la qalabeeyo Ciidammada, walaalaha Turkiga ayaana qalabeyn doona”ayuu yiri Mudane Maxamed Mursal Sheekh C/raxmaan Safiirka Soomaaliya ee dalka Turkiga.

Hadaba qorshahan ay wadajirka u diyaariyeen dowladaha Soomaaliya iyo Turkiga ayaa dhigaya in Seddaxda sano ee soo socota Soomaaliya loo tababarro Ciidammo tiradoodu gaareyso 25,000 Askari (Shan iyo Labaatan kun) ayadoo ciidammadaasina loo qoondeeyey iney hantaan amniga guud ee Dalka kadib marka la qalabeeyo.

Shirar kale oo daba socda shirkan ka dhacay Ankara islamarkaana looga hadli doono ajandahan ay labada dowladood sida wadajirka ah u diyaariyeen ayaa waxey ka dhici doonaan magaalada Muqdisho ayadoo sidoo kalena in qorshahan hirgelintiisa taageerro loo helo la horgeyn doono shirka bisha June ee sanadkan ka dhici doona magaalada London kaasi oo ay dowladda Britain marti gelin doonto.

Fulinta qorshahan waxaa wadajir mar walba ula socon doona labada Dowladood ee Soomaaliya iyo Turkiga oo iyagu markii horeba islasoo diyaariyey ayadoo si gaar ahna ay loogu xil saaray la socodka xaalada fulinta qorshahan halka uu marayo Safaaradda Soomaaliya ee Turkiga.

Kulankan ayaa muhiim u ah qorshaha ay Dowladda Federaalka Soomaaliya ku dooneyso in dib u dhis loogu sameeyo Ciidammada Qalabka Sida ee Soomaaliyeed ayadoo diyaarinta qorshahanna ay timid markii ay Wasiirrada Gaashaandhigga ee Soomaaliya iyo Turkiga dhowaan dalkaasi heshiis iskaashi ku kala saxiixdeen.

Daawo sawirrada