Madaxweynaha Somaliland Axmed Maxamed Maxamuud (Siilaanyo), ayaa maanta wareegto uu soo saaray isku-bedel iyo xil-ka-qaadis ku sameeyay Wasiiro ka tirsan Xukuumaddiisa.

Sida lagu sheegay Warsaxaafadeed maanta ka soo baxay Madaxtooyada Somaliland, Wasiirku wuxuu xilalkii ay hayeen ka qaaday laba Wasiir oo ka tirsan Xukuumaddiisa, halka uu xilal aan kuwii ay hore u hayeen ahayn uu u magacaabay Wasiiro hore, isla markaana uu kuwo cusub magacaabay.

Warsaxaafadeedkaasi wuxuu u dhignaa sidan;

“Madaxweynaha JSL Mudane: AXMED MAXAMED MAXAMUUD (SIILAANYO)  Waxa uu maanta digreetooyin Madaxweyne Xilkii kaga  Qaaday laba Wasiir, sidoo kalena ku Magacaabay  laba Wasiir  oo Cusub,  Waxa kale oo uu Madaxweynuhu Wasaaradihii hore ee ay hayeen ka bedelay labada Wasiir ee Wasaaradaha ee Warfaafinta iyo Xanaanada Xoolaha oo uu u Magacaabay Wasaarado Cusub.

Madaweynaha JSL. Mudane Axmed Maxamed Maxamuud “Siilaanyo”
Markuu Arkay: Qodobka 90aad, faqradiisa (2)aad ee Dastuurka Jamhuuriyadda Somaliland,
Markuu Tixgeliyey:   Ahmiyadda wayn ay Wasaaraduhu u leeyihiin Dalka iyo
Dhismaha Qaranka,
Markuu Arkay:   In baahi loo qabo buuxinta jagooyinkan hoos ku xusan,
Markuu Ka Fiirsaday:   Kartidooda, aqoontooda iyo hufnaantooda shaqo,
Markuu ku Qancay:    In ay hanan karaan xilalka loo magacaabay.

Wuxuu go’aansaday

1-In Mudane, Axmed Cabdi Xaabsade, laga bilaabo taariikhda maanta uu ahaado Wasiirka Wasaaradda Warfaafinta iyo Wacyigelinta ee JSL.

2- In Mudane, Dr. Cabdi Aw Daahir Cali, laga bilaabo taariikhda maanta uu ahaado Wasiirka Wasaaradda Xanaanada Xoolaha, Deegaanka iyo Horumarinta Reer Miyiga ee JSL.

3- In Dr. Axmed Xaashi Oday,oo hore u ahaa Wasiirka Wasaarada Xanaanada Xoolaha, Deegaanka iyo horu-marinta Reer Miyiga laga Bilaabo Maanta uu  ahaado Wasiirka Wasaaradda Boosaha iyo Isgaadhsiinta JSL.
4-In Mudane, Cabdilaahi Jaamac Cismaan (Geel-Jirre), oo hore u ahaa Wasiirka Wasaarada  Warfaafinta iyo Wacyi-gelinta laga bilaabo maanta uu ahaado  Wasiirka Wasaaradda Kalluumaysiga iyo Khayraadka Badda JSL.

Madaxwweynaha JSL isagoo uga Mahad celiyey Mudadii ay Xilka soo hayeen  waxa uu Xilkii Wasiir-nimo ka Qaaday isla  markaana Faray in ay Wasiirada Cusub ku wareejiyan Xilkii Wasaaradaha ee ay hayeen.

1- Wasiirkii Wasaarada  Kalluumaysiga iyo Khayraadka  Badda  Dr. Maxamed Yaasiin Xasan

2- Wasiirkii  Boosaha iyo isgaadhsiinta   Cabdirisaaq Ibraahim Maxamed.”

Waa markii u horraysay ee Madaxweyne Siilaanyo isku-bedel kooban ku sameeyo Golihiisa Wasiirada tan iyo intii xilka loo doortay, hase ahaatee, dadweynaha ku dhaqan Somaliland ayaa u muuqda kuwo filayay in Madaxweynuhu sameeyo isku-shaandhayn intan ka ballaadhan