Maamulka Ahlu Sunna wal-Jamaaca ee gobollada dhexe ee Soomaaliya oo si weyn u cambaareeyey weerarkii argagixiso ee maalinimadii shalay lugu qaaday xarunta madaxtooyada (Villa Somalia) ee magaalada Muqdisho.

Guddoomiyaha guddiga fulinta maamulka Ahlu Sunna, Sheekh Cabdirisaaq Cali Mire ( al- Ashcari) ayaa warbaahinta u sheegay in weerarkii shalay uu ahaa mid la doonayay in niyadda loogu dhiso maleeshiyada tabar-darreystay ee al-Shabaab, waa siduu hadalka u dhigaye.

Wuxuu sidoo kale, tilmaamay in weerarkii shalay uu meel-ka dhac ku ahaa sumcadda iyo jiritaanka qarannimada Soomaaliya, sidaas darteedna dowladda looga baahan yahay inay qaaddo tallaabooyin deg-deg ah oo ay uga jawaabayso falka manta ka dhacay madaxtooyada.

Shacabka Soomaaliyeed ayuu uga tacsiyeeyay dadkii ku dhintay weerarka, wuxuuna kuwa dhaawacmay Alle uga baryay inuu caafimaad siiyo.

Al-Ashcari ayaa dowladda u soo jeediyay inay ilaaliso niyadsamida iyo xuquuqda ciidamadeeda, maadaama la joogo xilligii lala xisaabtami lahaa kooxda nabad-diidka ah.

Guddoomiyaha ayaa ka codsaday dadweynaha Soomaaliyeed inuusan niyad-jabin, ciidamada dowladda iyo kuwa AMISOM-na laga gacan-siiyo xaqiijinta ammaanka.