Shirkadda SKA Air & Logistic, ayaa
maanta ka billowday garoonka diyaaradaha ee Muqdisho howl tijaabo ah,
waxaana ma'suul u hadlay shirkadda uu sheegay inay rajeynayaan inay
howsha guud ee garoonka ay dhawaan la wareegaan.
"Howsha, aan maanta bilowday waa mid tijaabo ah. Waxaana ku billowday
sugidda ammaanka garoonka, gaar ahaan rakaabka duulaya iyo kuwa soo
dagaya," ayuu yiri Martin Beale oo ah ku-simaha madaxa shirkadda SKA Air
ee dalka Soomaaliya.
Mr. Beale, wuxuu sheegay in qalabka ay ku shaqeynayaan ay isugu
jiraan kuwo ay leedahay DKGM ah oo hadda ay howlgeliyeen iyo kuwo ay
iyagu la yimaadeen, si ay howsha garoonka u fududeeyaan, wuxuuna xusay
in howshan ay tijaabo uun tahay.
"Howsheenna, waxaan bilaabaynaa marka uu baarlamaanku ansixiyo
heshiiskii aan xukuumadda la galnay, sidoo kalena ay ka hadlaan madaxda
dowladda ugu sarreysa sida madaxweynaha Sheekh Shariif Sheekh Axmed,"
ayuu yiri Beale.
Shirkadda SKA Air & Logistic, oo ah shirkad fadhigeedu yahay
dalka Imaaraadka Carabta, ayaa waxaa heshiiska la gashay xukuumaddii
hore, inkastoo aan xilligaas lagu wareejin maamulka guud ee garoonka
diyaaradaha Muqdisho.
"Shirkadda
heshiis ayaan la galnay, waxaana lagu wadaa inay la wareegto guud ahaan
garoonka diyaaradaha, howsha ay bilowdayna waa mid tijaabo ah," ayuu
yiri Dable Biloote oo ah maareeyaha garoonka diyaaradaha Muqdisho,
isagoo intaas ku daray: "Qalabka ay SKA Air ku shaqeynayso, qaar ka mid
ah dowladda ayaa iska leh."
Garoonka Aadan Cadde, ayay shirkadda SKA ku casuuntay maanta
wariyeyaal ka socda qaybaha kala duwan ee warbaahinta Muqdisho, waxaana
xilligaas garoonka ka socday howl lagu sugayo ammaanka rakaabka duulaya
iyo kuwa soo dagaya.
Maareeyaha garoonka, ayaa wariyeyaasha u sheegay, in xukuumadda cusub
ay la qabsatay heshiiskii horay u dhexmaray shirkadda SKA Air iyo
xukuumaddii hore, ayna rajeynayaan 90% in shirkaddan lagu wareejiyo
garoonka diyaaradaha.
Ku simaha guddoomiyaha SKA Air, ayaa isaguna sheegay in qorshahoodu
uu yahay mid ay ku horumarinayaan garoonka Muqdisho, si ay suugoral u
noqoto inay kusoo dagaan diyaarado caalami ah.
"SKA Air, waxay keentay garoonka, qalabkii xamuulka looga dajin lahaa
iyo kuwii lagu saari lahaa diyaaradaha, qalabkii lagu nadiifin lahaa
musuqulaha diyaardaha, gaadiidka ay saaran yihiin jaranjarooyinka looga
soo dago diyaaradaha iyo qalab kale, oo dhamaantood casri ah," ayuu yiri
Martin.
Intii
ay howshu socotay, waxaa garoonka kusoo dagay in ka badan saddex
diyaaradood oo qaaarkood, waday jaad, kuwo qaadayay rakaab iyo kuwo kale
oo tarxiil ka keenay dalka Sucuudiga.
Tarxiilka, maanta la keenay ayaa waxaa ku jiray haween qaarkood aan
xirnayn dhar wanaagsan, iyo rag sidoo kale qaarkood ay
feero-qaawnaayeen, waxayna si kooban ugu sheegeen dhowr wariye oo la
kulmay in xalay gallinkii dambe lasoo duuliyay.
Baarlamaanka Soomaaliya, ayaan weli go'aan ka gaarin heshiiska ay
dowladda KMG ah la gashay shirkadda SKA Air & Logistic, taasoo ka
mid ahayd shirkado badan oo xukuumadda laga codsaday inay caddeyso
heshiisyadii lala galay.