Madaxweynaha Jamhuuriyadda Federaalka Soomaaliya Mudane Xasan Sheekh Maxamuud iyo wafdi uu hogaaminayo oo maalmahan socdaal Shaqo ku joogay dalka Kenya ayaa soo gebagebeeyey socdaalkaasi, iyadoo Wafdiga Madaxweynaha ay shaaciyeen in ujeedadii socdaalka loo gaaray si dhameystiran.

Madaxweynaha iyo wafdigiisa oo booqasho Sadex cisho qaadatay ku Joogay Kenya ayaa saaka ka ambabaxay Nairobi, iyagoo gaaray Magaalada Kambala ee dalka Ugandha.

Wasiirka Warfaafinta Boostada iyo Isgaarsiinta mudane C/llaahi Ciilmooge Oo ka mid ah wafdiga madaxweynaha ayaa sheegay in ujeedada Booqashadii madaxweynaha ee Kenya lagu guuleeystay Boqolkiiba Boqol.

Muddadii uu madaxweyne Xasan Sheekh Maxamuud joogay Kenya ayaa Waxaa uu la kulmay madaxweynaha dalkaasi, Safiirada qaar ka mid ah Wadamada caalamka u jooga Nairobi iyo jaaliyada Soomaaliyeed ee ku Nool dalkaasi. Waana safarkii ugu horeeyay ee madaxweyne Xasan Sheekh Maxamuud uu ku tago Kenya tan iyo markii loo doortay xilka madaxweynaha J.F.Soomaaliya.