Wasiirka Gaashaandhiga "Daruufo jira awgood ayaa waqtiga ugu kordhinay cafiskii aan u fidanay dhalinyarada Al Shabaab"
Wasiirka
Gaashaandhiga ahna Ra'iisul wasaare Kuxigeenka C/xakiin Xaaji Maxamuud
Fiqi ayaa sheegay in Xukuumada ay waqti aan la cayimin ugu dartay
cafiskii ay u fidisay Dhalinyarada Shabaab, isagoo xaqiijiyay inay jiraan
wali wada hadalo ay la leeyihiin ragga Shabaabka ka tirsan oo doonaya
inay isku soo dhiibeen.
C/xakiin Fiqi oo la hadlay Warbaahinta ku hadasha Afka Dowladda ayuu
sheegay in maalmo ka hor ay isku soo dhiibeen raggii aas aasay Shabaab,
hase ahaatee magac ama tiro midna ma uusan sheegin, inkastoo hadalkaas
loo qaadan karo barobagaandada dagaalka afka.
"Waxaan cadeyneynaa inaan muddo ku kordhinay waqtigii cafiska, waxaa
maalin iyo habeenba na soo wacaya dhalinyaro jecel inay ka soo goostaan
kooxahaas nabad diidka ah"ayuu yiri Mr Fiqi oo ka mid ah Wasiirada
gacanta midig ee Farmaajo baalashiisa ku hoos jira, isla markaana horay
ay u wada degenaayeen Mareykanka.
C/xakiin Fiqi ayaa lagu tilmaamaa inuu yahay nin aan inta badan waxba ka
aqoon arrimaha Milateriga iyo gaashaandhiga, taasoo loo aaneynayo ilaa
iyo hada habacsanaanta Ciidamada Dowladda iyo isku dhex yaac, sidoo
kalena qeyb ka yahy isku xir la'aanta Ciidamada Dowladda iyo AMISOM,
kadib markii dhowaan Ciidamada Uganda si qaldan u duqeeyeen goobo ay la
wareegeen Ciidamada Dowladda.
Inta badan Ciidamada Dowladda iyo kuwa AMISOM ayaan sidaas u wada
shaqeyn, xilliyada dagaalada dhacaan, waxaana wali muuqda is faham daro
Ciidamada dhexdooda oo ku wajahan qaabka dagaal gelinta, taasoo horay u
dhacday in meelo ay qabsadeen Ciidamada Dowladda ay uga soo baxeen
caawimaad la'aan dhanka saadka iyo taageeradaba.
Add New Comment
|
|
|