Madaxweynaha Dowladda Uganda Yoweri Museveni ayaa jawaab ka bixiyay eedeymo  ay maanta Xarakada Al-Shabaab u jeedisay Dowladaha Uganda iyo Dowladda Burundi oo ay Ciidamo ka joogaan Soomaaliya.

Madaxweyne Museveni waxaa uu sheegay in Dowladdiisa ay garaneyso sida loo weeraro dalka Uganda, “Waa naqaanaa sida loo weeraro kuwa na soo weerara” ayuu yiri MAdaxweyne Museveni oo Wariyayaal kula hadlayay Magaalada Kampala oo sheegay in aad uga taxadar qabaan weearrro lagu soo qaado Uganda.

Madaxweyne Museveni waxaa uu sheegay in Kooxaha ugu hanjabaya in ay soo weerarayaan ay yihiin kuwo dhulka jooga oo aanan dayaxa dushiisa deganeyn, sidaas darteedna ay ku qaadi karaan mid la mid ah weerarka ay ku qaadaan.

Hadalka Madaxweynaha Uganda ayaa wuxuu ku soo beegmayaa iyadoo maanta madaxa Xarakada Al-Shabaab ee Gobolka Banaadir Shiikh Cali Maxamed Xuseen uu sheegay in ay weerar ku qaadi doonaan Magaalooyinka Kampala iyo Bujumbura ee dalalka Uganda iyo Burundi.

Shiikh Maxamed Xuseen ayaa sheegay in sababta ay dalalkaas u weerarayaan ay tahay iyadoo ay ciidamo ka jooga Soomaaliya ay xasuuq ka geysteen Suuqa Bakaaraha, wuxuuna caddeeyay in si la mid ah sidii looga baroortay Magaalada Muqdisho looga barooran doono Magaalooyinka Kampala iyo Bujumbura.