Goobihii maalmihii ugu dambeeyey lagu dagaalamayey ee waqooyiga magaalada Muqdisho ayaa maanta waxa ka jira deganaansho aan laysku halleyn karin, kaddib markii si ba'an shalay laysu weydaarsaday madaafiic iyo hoobiyeyaal aad u cul culus, ayadoo dadkii goobahaa degganaana ay intooda badan isaga carareen degaannadoodi.

Degmooyinka Kaaran, Yaaqshiid iyo Shibis ayaan maanta wax rasaas ah laga maqleynin, ka gadaal markii ay dagaalo faraha lagaga gubtay ay ka dhacayeen saddex maalmood oo xiriir ah, kuwaasoo u dhexeeyey Ciidamada Dowladda KMG oo ay dhinaca madaafiicda ka caawinaayeen ciidamada Midowga Afrika ee AMISOM iyo xoogagga Xisbul Islaam iyo Xarakatul Shabaab Al Mujaahidiin oo isku dhinac ah.

Ciidamada labada dhinac ayaa weli isku horfadhiya dhammaan goobihii lagu dagaalamay, waxaana laga yaabaa in goor walba uu dib u qarxi karo dagaalka maadaama aysan jirin cid isku howleysa in xabadda la joojiyo, ayadoo dhammaan wixii dadaallo ahaa ee horey la'iisugu dayeyna ay dhammaantood fashil ku wada dhammaadeen.