Madaxweynaha Dowladda Soomaaliya Shiikh Shariif Shiikh Axmed iyo Wafdi uu hoggaaminayo oo ka soo laabtay Dalka Liibiya oo uu uga soo qeybgalay Shir Madaxeedkii Midowga Afrika ayaa wuxuu haatan ku sugan yahay Magaalada Addis Ababa ee xarunta Dalka Itoobiya.

Danjiraha Soomaaliya u fadhiya Dalka Itoobiya Saciid Yuusuf Nuur ayaa Laanta Afka Soomaaliga ee BBC-da u sheegay in madaxweynaha uu soo gaaray magaalada Addis Ababa, isla markaana ay wada hadallo leeyihiin madaxda dalka Itoobiya.

Danjire Siciid Yuusuf Nuur waxaa uu sheegay in Madaxweynaha Soomaaliya uu horay u soo maray Dalka Jibouti, halkaasi oo uu kulan kula soo qaatay Madaxweynaha Jibouti Ismaaciil Cumar Geelle oo aan isagu ka qeybgelin shir madaxeedkii Midowga Afrika.

Madaxweynaha Soomaaliya inta uusan dib ugu soo noqon dalka Soomaaliya waxaa uu socdaallo ku tegi doonaa Dalalka Kenya iyo Uganda oo uu madaxdooda kala soo hadli doono arrimo ku saabsan sidii ay u garab istaagi lahaayeen Dowladda Soomaaliya oo dagaallo kula jirta xoogag hubeysan oo ka soo horjeeda.

Dalalka uu booqanayo Madaxweynaha oo Bariga Afrika ku yaalla ayaa waxay dowladda Soomaaliya ka dooneysaa in ay mileteri ahaan u caawiyaan, isla markaana ay ka difaacaan xoogagga hubeysan ee dagaalka kala soo horjeeda.

Dhawaan ayay ahayd markii Dowladda Soomaaliya ay ka codsatay dalalka Beesha Caalamka iyo kuwa Soomaaliya la deriska ah in ay faragelin Mileteri oo deg deg ah ku sameyso Soomaaliya, iyadoo sheegtay in ay khatar dhinaca amniga ah ku hayaan Dagaalyahanno Soomaali iyo Shisheeye isugu jira oo weerar ku ah.

Ugu dambeyntiina ilaa iyo haatan ma jiro dal si rasmi ah uga jawaabay codsigaas ka soo yeeray Dowladda Soomaaliya, marka laga reebo in Midowga Afrika uu taageeray codsiga ay jeedisay Dowladda Soomaaliya.