Dagaal culus oo laysu adeegsanyo hubka cul culus iyo midka fududba ayaa saakay aroornimadii ka billowday goobo ka tirsan waqooyiga magaalada Muqdisho, dagaalku wuxuu u dhexeeyaa ciidamada Dowladda KMG iyo xoogagga hubeysan ee ka soo horjeeda.
Dagaalka ayaa hadda si aad ah uga socdo agagaaraha Hoteel Global ee degmada Cabdicasiis, halkaasoo ah goob ay beryahanba isku horfadhiyeen labada ciidan, ayadoona hadda si aad aad loo maqlayo dhawaqa rasaasta ka dhacda qoryaha culculus iyo kuwa fududba ee ay labada dhinac is weydaarsanayaan.
Wararka ka imanaya goobaha ku dhowdhow halka uu dagaalku ka socdo ayaa sheegaya in dadkii fara ku tiriska ahaa ee xaafadahaasi ku haray durbaba la arkaayo ayagoo isaga cararaya halkaasi, si ay naftooda uga badbaadiyaan rasaasta iyo madaafiicda culculus ee halkaasi ka dhacaysa.
Waxaa adag in la ogaado khasaaraha ka dhashay dagaalkan oo si xowli ah u socda, waxaadse kala socon kartaan wixii soo kordha sahabakadda SilGor.com insha' Allaah.