CULIMADA MUSAALAXADA EE UU SHIRKU UGA SOCDAY MUQDISHO OO BAYAAN SOO SAARAY

Culumada Musaalaxada iyo Sixidda Soomaaliyeed ee maalmahanba uu shirku uga socday magaalada Muqdisho ayaa maanta soo gebagebeeyey fadhigoodi, soona saaray bayaan lwaafaqsan shareecada Islaamka oo lagu kala saarayo xoogagga Islaamiyiinta ee soo kala horjeeda, bayaankana wuxuu u qornaa sidan:-

Go'aamada iyo Bayaanka Shirka Culumada Soomaaliyeed

1. Dhiigga Muslimka ee xaqdarrada lagu galo

Waxay Culumadu caddaynayaan inay xaaraan tahay sharci ahaan in qof muslim ah daadiyo dhiigga dadka muslimiinta ah ee soomaaliyeed, si gaadmo ah iyo si bareer ah midnaba, ama sabab loo noqdo, ama uu ku xadgudbo Xoolihiisa iyo sharafkiisa, waxaana arrinkaas ka dhalanaya khasaare adduunyo iyo mid aakhiro, waxaana waajib ah in qof kasta oo horay u galay dhiigga qof muslim ah si sharci darro ah inuu towbad keeno, naftiisana u dhiibo una gacan galiyo ciddii uu dhiigga ka galay (dhaawacay) ama dadka leh dhiiggiisa (hadduu dil dhaco).

2. Xadgudubka Diineed

Waxay Culumadu caddaynayaan:-

Inay waajib tahay in lagu dhago laguna toosnaado Manhajka Ahlusunna waljamaca ee dhexdhexaadka ah dhammaan arrimaha diineed ee qofka muslimka ah, lagana fogaado wax alla wixii xadgudub ama gaabin diineed ah, gaar ahaan arrimaha dhiiga, xoolaha, iyo sharafka Qofka muslimka ah sida uu allahba yiri S.W:

{وكذلك جعلناكم أمة وسطا لتكونوا شهداء على الناس}

{ وإذا جاءهم أمر من الأمن أ والخوف أذاعوا به ولو ردوه إلى الرسول وإلى أولي الأمر منهم لعلمه الذين يستنبطونه منهم....}

In aga digtoonaado ku degdegidda Gaaleysiinta ruuxa muslimka ah iyo riddo ku xukunkiisa, taas oo lagu banneysanayo dhiiggiisa, xoolihiisa iyo sharafkiisa, maxaa yeelay xukunka arrinkaas waxaa geli kara oo kali ah Culumo u khaas ah, kuwaasoo cuskanaya ama tixgalinaya Xuduudaha uu sharcigu u dhigay arrintaas oo ah:-

- Inay qofka ka dhacdo arrin keeni karta gaalnimo dhab ah

- In la helo Shuruudaha sharcigu u dhigay gaalaysiinta Shakhsiga.

- In laga waayo wax ka horjoogsada in lagu rido Xukunkaas

Gaalaysiinta ama ridada ah.

Waxaa xadgudub diineed ah Dilka, afdubka, dhaca, iyo dhibateynta loo geysanayo hay'adaha iyo dadka gaarka ah ee ku soo galay waddanka Dammaanadda jiho ama qof Muslim ah, hadday dhacdo inay ku kacaan hay'adahaas ama shakhsiyaadkaas wax xadgudub ku ah dadka diintooda ama akhlaaqdooda, waxaa waajib ah in lagala xiriiro cidda Damiinka ka ah.

3. Dhaqangelinta Shareecada Islaamka

Maaadaama ay sharecadu tahay waajib diini ah, dalabka shacabka, Furaha Amniga iyo Musaalaxada, waxaa wajib ku ah dowladda ianay qaadato go'aan cad oo ah ku dhaqanka shareecada Islaamka si Buuxad, si ay taasi u dhacdana waa in baarlamaanku soo saaro si dhab ahna ugu dhawaaqo arinkaas muddo sagaashan cisho gudahood ah laga bilaabo 01/03/2009. taas oo asaas u ah taageerada shacabka iyo kalsoonidiisa.

4. Axdiga Ku meelgaarka ah

5. Ciidamada Shisheeye

kaddib markaan miisaanka sharciga ah saarnay arrinka ciidamada shisheeye ee wadanka joogo, waxaa noo soo baxay arimaha soo socda:-

Ciidamada wadanka joogo kuma imaan qaab waafaqsan shareecada Islaamka iyo doonista shacabka midna.

Ciidamadaan sii jogitaankoodu waa mid aysan shareecadu ogolayn ummadduna aanay raalli ka ahayn.

Joogitaankoodu waxaa uu dhib ku yahay ummadda diinteeda, Anshaxeeda, Amnigeeda iyo madaxbananideeda.

Sidaa darteed waxaa waajib ku ah dowladda:-

Inay dalka ka saarto ciidamada hadda joogo ugu badnaan mudo 120 cisho gudahood ah taas oo ka bilaabanaysa: 01/03/2009.

Habka lagu saarayo waa inuu noqdo hab aan dagaal ahayn, sababta oo ah:-

- Waxaa waajib sharci ah Xifdinta Dhiigga, Hantida iyo sharafka shacabka, oo aan sabab loo noqon dhibaato gaarta ayadoo la baajin karo.

Mudadaas gudaheeda waa in aysan ku kicin Ciidammada hadda jooga falal dhaqdhaqaaq dagaal, isbaahin iyo dhibaatayn shacab toona, iygana waa in aan la weerarin.

Waa in aan sinaba loo soo kordhin, ama aan loo keenin Ciidamo kale oo cusub

6. Mujaahidiinta ka soo horjeeda dowladda

Waxaa waajib ku ah mujaahidiinta dowladda ka soo horjeeda, isla markaana ah maslaxad sharci ah, ummadduna ka sugeysaa arrimaha soo socdo:-

Inay wax ka abuuraan Jawi nabadeed iyo fursad lagu xaqiijin karo arrimaha aan ku soo xusnay qodobbada (3,4,5 ) isla markaana ka qaataan kaalin sidii loo suurtogalin lahaa fulinta arrimahaas.

7. Haddii sida la soo sheegay wax u fuli waayaan

Haddii uu yimaaddo xad gudub lagu sameeyo fulinta go'aammada kor lagu soo xusay, amaba lagu fulin waayo xilligii loo qabtay, Dhinac kali ah go'aan ma qaadan karo, waxaase arrinkaasi uu u noqonayaa oo caddeynaya Hay'adda Culumada Soomaaliyeed, waxaana Go'aan ka gaaraya Ahlul xalli Walcaqdiga.

8. Musaalaxada iyo heshiisiinta

In la heshiisiiiyaa dadka walaalalaha ah waa waajib sharci ah,
waxa ayna ka mid tahay waxyaabaha waaaweyn ee allah
Loogu dhawaado S.W. sida uu Allah yiri:

{ لاخير في كثير من نجواهم إ ن مر بصدقة أو معروف أو إصلاح بين الناس}

Rasuulkuna wuxuu yiri S.C.W:

" ألا أدلكم على أفضل من درجة الصلاة والصيام والصدقة؟ قالوا بلى يا رسول الله صلى الله عليه وسلم، قال: إصلاح ذات البين، فإن فساد ذات البين هي الحالقة، لا اقول انها تحلق الشعر ولكنها تحلق الدين" أخرجه أحمد والترمذي وابن حبان وغيرهم من حديث أبي الدرداء.

Sidaa darteed waxaan ugu baaqeynaa dhammaan Ummadda Soomaaliyeed ee walaalaha ah inay ka fogaadaan wax alla iyo Wixii keeni karaya dagaal iyo dhiig dhexdooda ka daata af Af iyo addinba, taas oo keeni karta halaag aduunyo iyo mid aakhiro.

Waxaan ugu baqeyna in si degdeg ah ay u joojiyaan wax alla iyo waxii sabab u noqon kara kala fogaanshaha, kala tagga iyo is nacaybka.

Waxaan ugu baaqeynaa inay isu dhimriyaan isun dabacsanaadaan. Waxaan ugu baqeynaa in cid waliba ogaato in wadajirka oo kali ah lagu xaqiijin karo waxa alle raalliga ka yahay, ummaddana maslaxaddeeda ah.

Waxaan ugu baqeynaa in mashaakil walba oo la soo darsa dadka walaalaha ah dhexdooda in lagu xalliyo wadahadal si waafaqsan shareecada islaamka, lagana hor mariyo danta guud midda gaarka ah, Hay'adda Culumaduna waxa ay sii wadeysaa Musaalaxada iyo Heshiisiinta inta ay ka mirodhalayso inshaa'Allaah.

9. Waxaan ugu baaqeyna dhamman shacabka Soomaaliyeed

Shacabka, Mujaahidiinta ka soo horjeeda dowlada, Baarlamaanka & Xukuumadba gaar ahaan kuwii dalka cadowga keenay inay Towbad keen dhab ah la yimaadaan diintoodana qabsadaan, culumadoodana ka danbeeyaan, gacmahana isqabsadaan, xaqqana isuguna kaalmeeyaan.

Ugu dambeyn culumadu waxay u tacsiyeynayaan dhammaan ummadda soomaaliyeed ee dhibaatadu soo gaartay xilligii la soo dhaafay naf iyo maalba waxayna allaah uga baryayaan inuu siiyo badel khayr qaba, dhaawacoodana bogsiiyo dhibaatadoona xaliyo.

Wabilaahi Towfiiq