Dowlada Ethiopia ayaa ku eedaysay xildhibaanada Barlamanka KMG Soomaaliya xil gudusho la'aan iyadoo sheegtay in ay mushaar u soo doontaan magaalada Baydhabo marka ay bishu dhamaato.
Wasiirka arimaha dibada dalka Ethiopia Siyun Musfen oo maanta war-saxaafadeeda soo saaray ayaa inta badan ku dhaleeceeyay mudanayaasha Barlamanka KMG in ay iska joogaan magaalada Nairobi ee xarunta dalka Kenya oo aanan gudan masuuliyadoodii ka saarnayd shacbiga Soomaaliyeed.Waxa uu sheegay in xildhibaanada Barlamanka KMG ay intooda badan u taggaan magaalada Baydhabo eexarunta gobolka Bay in mushaarkooda billaha ah ay halkaasi ka soo qaataan. Siyun musfen oo sidoo kale soo hadal qaaday qilaafka u dhaxeeya madaxweynaha dowlada KMG Soomaaliya C/laahi Yuusuf Axmed iyo Raiisul wasaare Nuur Cadde iasgoo ku tilmaamay arinta u dhaxeysa 2-daas masuul mid laga xishooda oo salka ku haya arimo shaqsiyadeed iyo mid qabiil sida uu yiri Musfen. Wasiirka arimada dibada dalka Ethiopia waxaa uu sidoo kale war-saxaafadeekiisa uu ku sheegay in Urur goboleedka IGAD ay horayba u cadeeyeen in madax sare ee dowlada KMG Soomaaliya aanan gudan waajibaadkii looga baahnaa danta dadka iyo dalka Soomaliyeed, waxaana uu tilmaamay in mushkiladdahaatan Soomaaliya heysata aysan aheeyn dhanka ammaanka oo kaliya ee ay tahay heshiis la'aanta u dhaxeeysa madaxda sare ee dowlada FKMG Soomaaliya. Dhanka kale Suyum Musfin waxuu si kulul u weeraray ciidamada Gaashaanbuurta NATO ee ka howlgala biyaha Soomaaliya isagoo sheegay in ciidamadaasi aysan u shaqeyn sidii loo baahnaa. Waxaa uu tilmaamay in kooxaha burcad-badeeda Soomaalida ee ka qowleeysata biyaha Soomaaliya aysan aheeyn mallaay ka dhashay badda hase ahaatee ay yihiin kuwa ka yimid berrige Soomaaliya sidaa darteedna loo baahanyahay in marka hore xal loo raadiyo dalka Soomaaliya ka hor inta aan xal loo raadin kooxaha burcad badeeda Soomaalida ah, waxaana uu ugu dambayntii ka codsaday beesha caalamka in ay Soomaaliya u raadiso xal nabadeeda taasi oo geeska Africa ka dhalin karta nabad waarta.