Xubnaha Golaha Deegaanka Gobolka Banaadir oo maanta lagu dhaariyay Hoyga Ra'iisul Wasaaraha ayaa inta badan codkooda ku doortay Musharaxa Maxamed Cismaan Cali (Dhagaxtuur) Xubnaha Golaha Deegaanka oo ka kooban 69-xubnood oo lagu soo xulay qaabka awood qeybsiga 4.5, isla markaana54 ka mid ah ay xaadir ku ahaayeen xaflada lagu dooranayay Maamulka Gobolka Banaadir ayaa ka hor inta aanay dooran Gudoomiyaha Gobolka Banaadir iyo Kuxigeenadiisa waxaa lagu hor dhaariyay Ra'iisul Wasaaraha Soomaaliya iyo qaar ka mid Golihiisa Wasiirada.
Ra'iisul Wasaare Nuur Cadde oo ay garbihiisa fadhiyeen Ra'iisul Wasaare Kuxigeenkiisa ahna Wasiirka Warfaafinta Axmed Cabdisalaan iyo wasiirka Beeraha Mustaf Dhuxulow, Wasiir Kuxigeenka Gaashaandhiga Salaad Cali Jeelle iyo qaar ka mid ah Xildhibaanada Baarlamaanka oo ay ka mid yihiin Muuse Suudi Yalaxow, Xuseen Caraale Cumar Finish. Musharaxiinta u tartameysa Maamulka Gobolka Banaadir ka hor inta aysan soo bandhigin shuruudaha looga baahan yahay ayaa waxaa xilkii Gudigii KMG ah ee Gobolka Banaadir ee la magacaabay 9-kii Bishii September ee sanadkan waxay Ra'iisul Wasaaraha hortiisa ku wareejiyeen xilkii Gudigaas Golaha Deegaanka Gobolka Banaadir waxaana Goluhu ay guda galeen in Raga musharaxiinta ah ay soo gudbiyeen Liisaskooda.
Musharaxiinta u tartamaysay Maamulka Gobolka Banaadir oo ka koobnaa Lix xubnood ayaa waxay kala ahaayeen Maxamed Cismaan Cali Dhagaxtuur, oo u tartamayay Gudoomiyaha Gobolka, Eng. Axmed
Xaaji oo isna u tartamayay Maamulka Gobolka Banaadir, halka Gudoomiye Kuxigeenka 1aad ay u
tartamayeen C/fataax Ibraahim Shaaweye iyo Iimaan Jimcaale Faarax, halka gudoomiye Kuxigeenka 2aad ay u tartamayeen Axmed Aadan Shido iyo C/qani Cusmaan Kabreeto.
Axmed Xaaji oo ka mid ah Musharaxiinta u tartameysa Maamulka Gobolka Banaadir, kuna loolamayay Maxamed Cismaan Dhagaxtuur ayaa xilligii la guda
galay doorashada, ayaa isaga baxay hoolkii doorashada, waxaana xiliga codad tirinta uu helay Hal cod oo kaliya, taasoo aan la ogeyn sababta uu uga
baxay musharaxnimadiisa, mana soo gudbin wax tanaasul ah.
Maxamed Cismaan Cali (Dhagaxtuur) ayaa kama dambeys ku guuleystay doorashada, kadib markii uu helay codod dhan 50 cod, halka Ku-xigeenkiisa 1aad C/fataax Shaaweeye uu helay
38cod, halka Gudoomiye Kuxigeenka 2aad Axmed Aadan Shido uu helay 35cod.
Maamulka uu madaxda u yahay Maxamed Cismaan Cali (Dhagaxtuur) ayaa sida la sheegay ah KMG oo shaqeyn doono muddo 4 bilood, waxaana mudadaas gudahood ay Dowladda dhexe ku diyaarin doontaa xeer u gaar ah Magaalada Caasimada ah ee Muqdisho, sida uu qorayo Axdiga KMG.
Kadib markii la soo gaba gabeeyay doorashada iyo cod bixintaba waxaa lagu hor dhaariyay Ra'iisul Wasaare Nuur Cadde Xubnihii loo doortay Maamulka Gobolka Banaadir ee saddexda xubnood ah. Ra'iisul Wasaaraha oo hadal kooban ka jeediyay Munaasabada ayaa sheegay in sababta keentay in Beelaha
Soomaaliyed ay doortaan Maamul ay xor u yihiin ay keentay duruufo jira iyadoo xilligii hore loogu tala galay in dadweynaha ay soo doortaan Maamulkii hogaamin lahaa, balse haatan loo arkay in xilligan aysan suurta gal aheyn.