Shir socday laba maalmood oo ka dhacay magaalada Madrid ee dalka Spain, loogana
hadlay arrimaha dalka Soomaaliya ayaa maanta lasoo gabagabeeyay, iyadoo laga soo
saaray warsaxaafadeed ka kooban toddoba qodob.
Warsaxaafadeedka ayaa looga dalbaday dowladda KMG ah inay
muddo lixdan maalmood ah kusoo gabagabeyso qorshe looga baxayo xiliga KMG ah ee
dowladdu ay haatan ku shaqeyso, ayna si dhaqso badan ku
fuliso.
Sidoo kale, warsaxaafadeedka ayaa lagu sheegay in xilliga
KMG ah ee dowladda uu ku eg-yahay 20-ka August 2010, iyadoo hay’adaha xukuumadda
laga codsaday inay howshooda KMG ah kusoo gabgabeeyaan muddada yar ee
harsan.
Waxaa sidoo kale looga codsaday dowladda inay
dhameystirto qoraalka dastuurka cusub, si shacabka Soomaaliyeed ay uga baxaan
xilliga KMG ah ee dowladdoodu ku shaqeyso.
Qodobka saddexaad ee warsaxaafadeedkan ayaa lagu sheegay
in dowladdu xoojiso dib u heshiisiintii lagu gaaray dalka Jabuuti, ayna la
hadasho kooxaha kasoo horjeeda si ay ugu soo darto
dowladda.
Waxaa la isku raacay in la xoojiyo ciidammada AMISOM ee
ku sugan dalka Soomaaliya, lana gaarsiiyo tiradooda 8,000-askari, muddo koobanna
lagu gaarsiiyo 20,000-askari.
Howlaha la dagaalanka burcadbadeedda Soomaaliya ayaa la
dalbadya in la xoojiyo, iyadoo la codsaday in la tababaro ciidammada badda si ay
uga qaybqaataan la dagaalanka burcadbadeedda.
Sidoo kalena, waxaa laga dalbaday beesha caalamka inay
xoojinayaan taageerada ay siiyaan DKMG ah, ayna la xisaabtamaan hay’adaha
dowladda si loo ogaado halka uu ku baxo dhaqaalaha la
siiyo.
Qodobbada kasoo baxay shirka ayaa waxaa sidoo kale ka mid
ah in la kordhiyo gargaarka bani’aadamnimo ee shacabka Soomaaliyeed iyo in la
difaaco shacabka, sidoo kale waxaa hoosta laga xariiqay in la joogteeyo
diiwaangelinta tacadiyada xuquuqda aadanaha ee ka dhaca
Soomaaliya.
Madaxweynaha Soomaaliya oo shirka ka hadlay ayaa sheegay
inuu sida ugu dhaqsiyaha badan u soo magacaabayo ra’iisul wasaare cusub, sidoo
kalena uu wadahadallo la furayo kooxaha kasoo
horjeeda.
Wakiilka xoghayaha guud ee Qarammada Midoobay Augustine
Mahiga ayaa uga mahadceliyay dowladda Spain shirkan, waxaana shirkaas ka
qaybgalay in ka badan 45-dowladood oo daneeya arrimaha Soomaaliya iyo ururro
caalami ah.