Madaxweynaha Soomaaliya Sheekh Shariif Sheekh Axmed iyo xoghayaha guud ee
Qarammada Midoobay Ban Ki-Moon, ayaa si wadajir ah u guddoomiyay kulan xalay
lagu soo gabgabeeyay Magaalada New York ee dalka Mareykanka, kaasoo looga
hadlayay arrimaha Soomaaliya.
Sheekh Shariif, ayaa khudbaddii uu ka jeediyay shirka wuxuu kaga hadlay
xaaladaha siyaasadeed iyo midda bani'aadamnimo ee Soomaaliya, isagoo ka codsaday
dalalka iyo ururrada shirkaas ka qaybgalay inay gacan ka siiyaan sidii dib loogu
soo celin lahaa nabadda Soomaaliya.
"Madaxweynuhu, wuxuu codsaday in tababar loo fidiyo ciidammada dowladda iyo
la dhameystiro ciidammada AMISOM ee ku sugan Muqdisho, kuwaasoo ka socda dalalka
Burundi iyo Uganda," ayuu yiri wasiir arrimaha dibadda ee Soomaaliya Yuusuf
Xasan Ibraahim (Dheeg).
Wasiirku, wuxuu sheegay in madaxdii kasoo qaybgalay shirkaas ay muujiyeen,
sida ay uga go'an tahay gacansiinta Soomaaliya, isagoo sheegay in Sheekh Shariif
uu sheegay in dowladdu ay albaabbada u furtay cid walba oo doonaysa inay
wadahadal la gasho xukuumadda.
Madaxda shirkaas ka qaygalay oo ka socday 40-waddan iyo ururro ay ka mid
yihiin Midowga Afrika, Midowga Yurub, Jaamacadda Carabta, IGAD iyo kuwo kale oo
caalami ah, waxaana shirka oo dhan diiradda lagu saaray arrimaha dalka
Soomaaliya.
"Afrika diyaar ayay u tahay inay dhameystirto ciidammada AMISOM ayna
gaarsiiso 8,000-askari, balse waxaa loo baahan yahay dhaqaale lagu geeyo
ciidammadaas dalka Soomaaliya iyo qalab ay ciidammadu adeegsadaan," ayuu yiri
guddoomiyaha guddiga Midowga Afrika Jean Ping oo shirkaas ka hadlay.
Xoghayaha guud ee Qarammada Midoobay Ban Ki-Moon, oo isaguna ka hadlay
shirkaas ayaa sheegay in looga baahan yahay madaxda DKMG ah inay
khilaafaadyadooda xal ka gaaraan, sidoo kalena ay xoojiyaan dib u heshiisiinta,
ammaanka dalka sidii lagu soo-celin lahaana ay dhexda u xirtaan.
Madaxweynayaasha Kenya iyo Uganda oo iyaguna goobta ka hadlay ayaa sheegay in
dagaallada ka socda Soomaaliya ay khatar muuqata ku yihiin dalalkooda iyo kuwa
gobolka oo dhan, iyagoo dalbaday in xoogga la saaro sidii lagu xasilin lahaa.