Maamulka Ururka Xisbul Islaam ee degmada Afgooye
ayaa maanta amarro kusoo rogay saxafiyiinta ka howlgala degmadaas,
kaddib markii maanta lasii daayay wariyeyaal xiranaa 24-saac oo xiriir
ah.
Amarrada uu soo saaray maamulka ayaa waxaa ka mid ahaa in wariyaha
uu ku bilaabo warkiisa Bisinka, In warka lasoo marsiiyo Xafiiska
Wafaafinta Maamulka iyo In codadka laga duuban karo oo keliya xubnaha
maamulka.
Wareegtada amarradan lagu sheegay ayaa waxay kasoo baxday xafiiska
mas'uulka ugu sarreeya maamulka Xisbul Islaam ee Degmada Afgooye Sheekh
C/kariim Muuse Cumar, waxaana sidoo kale wareegtada amarradii lagu
xusay ka mid ahaa in warka maamulkooda laga qaadan karo Madaxa
Wafaafinta Sheekh Cali Sheekh Cumar.
Suxufiyiinta Xabsiga laga sii daayay oo u kala shaqeynayay
Idaacadaha SIMBA, XURMO iyo IQK oo xarumahoodu ku yaallaan Muqdisho,
waxaana loo xiray warar ay kasii daayeen Idaacadaha ay u shaqeeyaan.
Mid ka mid ah wariyeyaashan oo maanta saxaafadda uga warbixiyay
sababihii lagu xiray ayaa sheegay in looga yeeray saddexdooda xafiiska
Wafaafinta dabadeedna loo sheegay inay xiran yihiin, waxayna beeniyeen
inay sheegeen wararka lagu eedeeyay.
Ururka Xisbul Islaam ayaa dhawaan ka joojiyay Idaacadaha ka howlgala
Muqdisho inaysan sii dayn karin Heesaha iyo Muusiga, kuwaasoo ay
dhaqangeliyeen dhamaan idaacadaha marka laga reebo Idaacadda Dowladdu
ay maamusho ee Radio Muqdisho