Waxaa maantay magaalada Nairobi lagu qabtay shir
ay wafdi ka socda Golaha Ammaanka ee Qaramada Midoobay la yeesheen
Madaxda DKMG ah ee dalka Soomaaliya iyo sidoo kale qaar ka tirsan
madaxda maamul goboleedyada.
Shirka
oo la filayay inay kasoo baxaan go’aammo lagu soo afjarayo khilaafka
hareeyay madaxda DKMG ah ee ku aaddan wakhti kororsiga hay’adaha
dawladda iyo wakhtiga la qabanayo doorashada madaxtinnimada ayaan laga
soo saarin go’aammo cad cad oo arrimahaas ku aadan.
Balse
Golaha Ammaanka ee Qaramada Midoobay wafdiga ka socday oo ay ka mid
ahaayeen safiirka dalka Britain u fadhiya Qaramada Midoobay . Ambassador Mark Lyall Grant
, safiirka waddanka Koonfur Afrika u jooga Qaramada Midoobay Mr. Basu
Sangu iyo Ergayda Qaramada Midoobay u qaabilsan Soomaaliya Ambasador
Mahiga ayaa markii uu shirku dhammaaday saxaafadda u sheegay in la isla gartay saddex qodob.
safiirka dalka Britain u fadhiya Qaramada Midoobay . Ambassador Mark Lyall Grant ,oo ay Hiiraan Online waydiisay waxyaabaha ay yihiin qodobada ay ku heshiiyeen ee lagu
soo afjarayo khilaafka dawladda ayaa sheegay in madaxda dawladda ay ka
dalbadeen inay khilaafkooda ay dhammeeyaan heshiisna ka gaaraan
qabashada doorasho inta ka horreysa August, in dawladdu ay diiradda
saarto hawlaha adag ee horyaalla iyo in si wanaagsan ,loola shaqeeyo
Ergayga Gaarka ee Qaramada Midoobay u qaabilsan arrimaha Soomaaliya.
Mar la waydiiday tallaabada la gudboon Golaha Ammaanka haddii ay heshiis gaari waayaan madaxda dawladda ayay dhammaan masulliyiintu ka
gaabsadeen inay ka hadlaan, balse warar laga soo xigtay safiirka
Maraykanka u fadhiya Qaramada Midoobay haweeynayda lagu magacaabo Susan
Rice ayay ku tilmaantay in laga yaabo cunaqabataymo dhaqaale inay
saaraan hogaamiyayaasha dawladda haddii ay heshiis gaari waayaan.
Shirka maanta oo ay joogeen
Madaxweynaha Soomaaliya Shariif Sheikh Axmed, Ra’iisul wasaaraha
Maxamed Cabdullaahi Maxamed iyo Guddoomiyaha baarlamaanka Shariif Xassan
Sheikh Aadan ayaa waxaa sidoo kale kasoo qayb galay madaxweynaha dawlad
goboleedka Puntland, Madaxweynaha Galmudug iyo
wasiirka arrimaha dibadda ee Somaliland iyadoo sidoo kalana wafdiga
golaha ammaanku ay kulan la qaateen qaar ka mid ah bulshada rayidka ah.
Ugu dambayntiina Waxaa saxaafadda la hadlay taliyaha ciidamada Amisom General Nathan Mugisha
isagoo ka warbixiyay dagaalladii ugu dambeeyay ee ay ciidamadoodu la
galeen xarakada Alshabaab isagoo tilmaamay inay guulo ka gaareen iska
hor imaadyadii ugu dambeeyay.
Mar
ay Hiiraan Online waydiisay eedaymaha loo soo jeedinayo Amisom eek u
saabsan dukhaymaha goobaha ay shacabku ku badanyihiin ayuu ku micneeyay
in eedaymahaasi ay yihiin dacaayad aan waxba ka jirin.
Taliyaha ciidamada Amisom General Nathan Mugisha - Photo A. A/samad HOL