Kadib markii galinkii danbe ee shalay ay bur
burtay Buundadii Liqliqato ee Magaalada Beledweyne ayaa xalay ilaa
saakay waxaa ka soconaya gudaha Buundada dadaallo la doonayo in lagu
samata bixiyo hantidii saarneyd Gaarigii Xamuulka ahaa ee Buundadu la go'day.
Dadka
Magaalada Beledweyne Ilaa xalay wax iska weydiinayay saameyta ay bur
burka Buundadu ku yeelan karto -dhaq dhaqaaqii dhinaca Ganacsiga ee ka
dhaxeeyay qeybaha kala duwan ee Xaafaddaha Magaalada iyo
Ciidamada
Ururka Xisbul Islaam ee Maamula Magaalada Beledweyne oo is kaashanaya
ayaa siweyn isugu howlan sidii dibad looga soo saari lahaa Wabigga
Badeecadii saarneyd Gaariga.
Daafaha
Buundada ayaa lagu arkayaa Raashin isugu jirra Baasto, Bariis, Sokor,
Bur, iyo Noocyada Cabitaanka oo dibada loo soo saaray, waxaana muuqta
marka aad eegto raashinkaasi in ay yihii kuwo aan rajo danbe laga qabin
in la isticmaallo marka laga reebo Cabitaanka, waxaana sida uu mid ka
mid ah Ciidamada Ururka Xisbul Islaam u sheegay HOL jirra Raashin intaa
ka badan oo uu Wabiggu la tagay.
Dadka Magaalada ee ku kala
sugan Xaafadda Howl-wadaag iyo qeybaha kale Magaaladu ka kooban tahay
oo ah kuwo dano badan isaga xirran yihiin ayaa saakay la arkayay iyaga
oo qaarkood ku dul socday Biraha Buudada
si ay ugu kala gudbaan
Xaafadaha Magaalada, waxaana ay dhibaatada ugu darran la kulmay
Haweenka oo qaarkood xalay guryahood ka dhaxay kadib markii ay ku kala
go'doomeen labada dhinac ee Magaalada.
Wali
waxaa Buundada iyo daafaheeda Ilaalo xoog leh ka haya Ciidamada Ururka
Xisbul Islaam si loo ilaaliyo hantida inta bad qabta ee dibada loo soo
saaray, waxaana dhinaca kale jirra in Ciidamadu dadka uga digayaan in
ay soo dhawaadaan Buudada si aysan ugu dhicin maadaama Wabiggu aad u
buux dhaafay maalmihii aynu soo dhaafnay.
Sikataba ha ahateen
lama oga sida wax noqon doonaan marka la eego Muhiimada Buundadu u
laheyd isku socda Ganacsi ee Magaalada, waxaana jirra hadal heyn ku
aadan in la sameyn doono Doomo casri ah oo isku
xirra Xaafada Howl-wadaag iyo Xaafaddaha kale ee Magaalada Beledweyne.
Buundada
Liqliqto ee galinkii danbe ee shalay go'day ayaa waxaa la dhisay
Sanadku markii ahaa 1974-kii waxaa dhistay Wasaarradii howlaha guud ee
Xukuumadii Militariga aheyd sida uu HOL u sheegay Eng, Cali Xaaji
Shirwac oo dadka kula dar daarmay in la ilaaliyo Buundada lagu
magacaabo Buundo-weyn oo ah tan kaliya ee u soo hartay dadka ku dhaqan
Beledweyne.