SHEEKH AADAN MADOOBE: "Dowladda Soomaaliya way dhacday, kaddib markii ay gudan wayday waajibaaadkeedii"
Guddoomiyaha Baarlamaanka Soomaaliya Sheekh Aadan
Maxamed Nuur (Sheekh Aadan Madoobe) oo maanta shir jaraa'id qabtay ayaa
sheegay in dowladda Soomaaliya ay dhacday. Sheekh Aadan Madoobe ayaa kaga dhawaaqay hadalkan
albaabka hore ee xarunta Golaha Shacabka, isagoo sheegay in
baarlamaanka uu kalsoonida kala laabtay xukuumadda markii ay
garwaaqsadeen inay waxba qaban-wayday. "Xukuumadda Soomaaliya way dhacday, waxaana cod loo
qaaday kalsoonida kala laabtay 280-xildhibaan, 30-xildhibaan waxay
siiyeen codka, halka ay ka aamuseen 8-xildhibaanna" ayuu yiri Sheekh
Aadan Madoobe. Guddoomiyaha Baarlamaanka wuxuu sheegay in
Madaxweynaha Soomaaliya looga baahan yahay inuu soo magacaabo Ra'iisul
wasaare cusub oo soo dhisa ka tayo iyo waxqabad wanaagsan midda dhacday. "Madaxweynaha Soomaaliya waxaan ka codsanayaa in
muddo 30-maalmood kusoo Magacaabo Ra'iisul wasaare cusub, oo soo dhisa
xukuumad waajibkeeda kasoo bixi karta" ayuu yiri Sheekh Aadan Madoobe,
iyadoo kulankii baarlamaanka uu kusoo dhamaaday buuq iyo sawaxan. Ra'iisul Wasaaraha Soomaaliya Cumar C/rashiid Cali
Sharma'arke iyo Madaxweyne Sheekh Shariif Sheekh Axmed ayaan ka hadlin
weli hadalka kasoo baxay guddoomiyaha Baarlamaanka Sheekh Aadan Madoobe. Add New Comment
|
|
|