Xaflad ay soo qabanqaabiyeen Ururka SYL II iyo Dowladda Soomaaliya laguna
maamuusayay sannadguuradii 67-aad ee kasoo wareegtay aasaaskii Ururkii
dhallinhyarada Soomaaliyeed SYL ayaa maanta lagu qabtay Magaalada
Muqdisho.
Dhismaha Ururka SYL ayaa lagu soo bandhgay Sawirrada 13-kii
dhallinyaro ee aasaasay SYL oo ahaa halgamayaashii xornimada dalka, waxaana
halkaas la dhigay Ubax lagu maamuusayay.
Guddoomiyaha SYL II Faarax Xaaji Cali oo hadal ka jeediyay goobta ayaa sheegay
inay ku faraxsan yihiin in maanta ay xusaan 67-sano kaddib aasaaskii SYL, isagoo
sheegay inay wadaan qorshayaal ay ku dhisayaan Dhallinyaro la mid ah 13-kii
SYL.
"Ururka SYL II iyo Maamulka Gobolka Banaadir waxay wadaan qorshayaal
ay dib boorka uga jafayaan Ururka SYL, si dhexda ugu xirtaan badbaada dalka oo
19-sano kusoo jiray dagaallo iyo fowdo" ayuu yiri Faarax Xaaji
Cali.
Boorarka lagu soo bandhigay Xafladda ayaa waxaa ku xardhanaayeen
SYL II iyo erayo kale oo lagu muujinayo in dhallinyarada Soomaaliyeed ay weli u
heelan yihiin sidii ay dalkooda uga saari lahaayeen dhibaatooyinka
daba-dheeraaday ee dalka ka jira.
Wasiiradda Horumarinta Reer Miyiga
Qadiijo Maxamed Diiriye oo iyaduna hadal ka jeedisay xafladda ayaa waxay
sheegtay in loo baahan yahay in lagu daydo 13-kii dhallinyaro ee SYL oo dadaal u
galay inay dalkooda ka xoreeyaan gumeysigii xilligaas xoogga ku haystay.
"Dadka intii waa ka badan yahay, dhallinyaraduna intii waa ka badan yihiin, waa
in la helo dad la mid ah 13-kii wiil ee SYL aasaasay" ayay tiri wasiirradda oo
xustay in dalka uu u baahan yahay in dadkiisu ay dhibka ka
saaraan.
Guddooomiyaha Gobolka Banaadir Eng. C/risaaq Maxamed Nuur (Nuunne)
oo isaguna hadal ka jeediyay xaflad lagu maamuusayay SYL oo ka dhacday xarunga
Gobolka Banaadir ayaa sheegay in dhallinyaradii SYL ay ahaayeen geesiyaal
Taariikh uga tagay dadkooda iyo dalkooda.
"Dheere Xaaji Dheere oo ka mid
ahaa dhallinyaradii SYL ayaa ii sheegay maalin inay hadafkooda ku meel-mariyeen
ismaqal iyo istixgelin, iyadoo aanay jirin qabiil" ayuu yiri Eng. C/risaaq
Nuunne, oo dhallinyarada maanta ka dalbaday inay dalkooda ugu shaqeeyaan sidii
dhallinyaradii SYL.
Ruwaayado ka tarjumayay in dalka uu u baahan yahay dhallinyaradii SYL ee dhexda
u xirtay inay ka jibbo-keenaan hadafkooda ayaa lagu soo bandhigay Xarunta
Maamulka Gobolka Banaadir.