Ra'iisul wasaaraha xukuumadda KMG ah Soomaaliya Maxamed C/llaahi Maxamed
(Farmaajo) oo haatan isaga iyo wafdi uu hoggaaminayo ay ku sugan yihiin
magaalada New York ee Mareyanka oo ay uga qaybgalayaan kulanka Golaha Ammaanka
ee Qaramada Midoobay oo looga hadli doono arrimaha Somalia ayaa kulammo hordhac
ah la yeeshay xubno ka tirsan ergooyinka joogtada ah ee ka tirsan Qarammada
Midoobay.
Ra'iisul wasaaraha Soomaaliya ayaa Isniintii la kulmay la kulmay wakiillada
UN-ka ee dalalka Hindiya, Ruushka, Baraasiil, Jarmalka iyo Lubnaan oo dhammaan
ka mid ah dalalka 15-ka dal ee xubinaha ka ah golaha ammaanka ee Ummada
Midoobay. Sidoo kale, wuxuu maalintii Talaadada ahayd ee shalay uu sidoo kale la
kulmay ergooyinka dalalka Ingiriiska, Koonfur Afrika, Faransiiska, Kolombiya,
Shiinaha iyo Mareykanka.
Ujeedadooyinka kulammadan ayuu afhayeenka xukuumadda KMG ah ee Soomaaliya oo
ka mid ah wafdiga uu ra'iisul wasaaruhu hoggaaminayo wuxuu ku sheegay inay
ahaayeen sidii looga dhaadhicin lahaa wakiillada dalalkan xaalada dalka uu
marayo sidii looga bixi lahaa marxallada kala guurka ah.
Ra'iisul
wasaaraha Soomaaliya ayaa u mahad-celiyay mas'uuliyiintii uu shalay iyo dorraad
la kulmay sida uu golaha ammaanka ee Qarammada Midoobay mudnaanta u siinayo
arrimaha dalka Soomaaliya. Ra'iisul wasaaraha ayaa yimid New York markii
seddexaad tan iyo bishii Jannaayo sannadkan 2011. Tan oo muujineysa sida
Qarammada Midoobay ay u daneynayaan arrimaha Soomaaliya.
Ra'iisul
wasaaraha ayaa warbixin kooban siiyay dhammaan mas'uuliyiintii uu la kulmay iyo
sida ugu habboon ee looga bixi karo marxallada kala guurka ah bacdamaa uu
waqtigii hay'adaha dastuurka ah dhammaanayo August 2011, ilaa iyo haddana aysan
jirin go'aan ay hay'adaha dastuuriga ah ee dowladda KMG ah ku mideysan yihiin.
Mudane Famaajo ayaa aaminsan in xalka ugu habboon uu yahay in Soomaalida ay
iyaga dhexdooda wadahadlaan lana yimaadaan go'aan mideysan oo ay danta dalka iyo
dadka Soomaaliyeed ku jirto.
Golaha baarlamaanka ayaa bishii February
keligood go'aamiyay in saddex sano loogu daro xilliga uu shaqeynayo. Iyadoo
beesha caalamka iyo shacabka Soomaaliyeed ay walaac isku mid ah ka muujiyeen,
Iyadoo madaxweynaha Soomaaliya uu sheegay in mudada saddexda sano ah ay tahay
mid badan loona baahan-yahay in haddii go'aan la gaarayo ay dhammaan hay'adaha
dastuuriga ah ee dowladda kawada tashadaan.
Ra'iisul Wasaaraha ayaa u sheegay mas'uuliyiintii uu la kulmay in xukuumadda
KMG ah ee Soomaaliya ay guddi heer wasiir ah u saartay inay la kulmaan
baarlamaanka si looga wada hadlo mowqif mideysan oo ay danta shacabka ku
jirto.
Maanta oo Arbaco ah ayaa lagu wadaa in shirka golaha ammaanka ee Qarammada
Midoobay ee looga hadlayo arrimaha Soomaaliya uu ka furmo New York, iyadoo uu
warbixin dheer ka jeedin doono ra'iisul wasaaraha Soomaaliya, taasoo ku saabsan
xalaadda dalka Soomaaliya ka jirta.
Sidoo kale Golaha Ammaanka ayaa lagu wadaa inay dalal Afrika ka tirsan
socdaal shaqo ku soo maraan, taasoo diiradda lagu saari doono arrimaha Somalia
iyo sida xal loogu heli karo xilliga kala guurka ah.