Danjiraha Soomaaliya u fadhiya waddanka Talyaaniga
iyo Midowga Yururb mudane Nuur Xasan Xuseen (Nuur Cadde) ayaa maanta
magaalada Brussels ee waddanka Belgium warqadihii aqoonsiga safiirnimo
ku guddoonsiiyey boqorka dalkaasi.
Munaasabadda danjire Nuur Cadde loogaga guddoomayey
waraaqaha aqoonsiga safiirnimada Midowga Yurub ayaa waxa ay ka dhacday
qasarka uu boqorka dalkaasi ka deggan yahay Brussels ee Qasarka Royal
Laekan, halkaasoo uu boqor Albert II uu si rasmi ah u aqoonsaday
danjirenimada mudane Nuur Cadde ee uu danjiraha uga noqonayo dalkiisa
Midowga yurub (EU).
Soo dhoweyn aad u heer sareysay kaddib ayey King
Albert II iyo Danjire Nuur Xasan Xuseen (Nuur Cadde) waxa ay labada
mas'uul ka wada hadleen xiriirka labada dal ee Soomaaliya iyo Belgium,
xaaladda adag ee ka taagan dalka Soomaaliya iyo sidii dowladda
belgiumka ay gacan uga geysan lahayd xal u helidda dhibaatooyinka ka
taagan Soomaaliya, intaas kaddib ayuu mudane Nuur Cadde u gudbiyey
boqorka salaan uu uga siday Madaxweynaha Jamhuuriyadda Soomaaliya
mudane Sheekh Shariif Sheekh Axmed, ayadoo boqorkuna uu danjiraha ka
codsaday inuu salaan middaasi la mid ah ka gaarsiiyo Madaxweynaha
Soomaaliya.
Dowladda uu hoggaamiyaha ka yaha Madaxweyne Sheekh
Shariif Sheekh Axmed ee Soomaaliya ayaa u muuqata mid si weyn ugu
guuleysatay siyaasadaha arrimaha dibedda iyo xiriirka wanaagsan ee ay
la leedahay caalamka, hase ahaatee ay dhibaato aad u weyni ka heysataa
sidii loo xasilin lahaa gudaha waddanka Soomaaliya, kaddib markii uu
dalku kusoo jiray fowdo iyo xasillooni darro soo jiitameysay muddo ku
dhow 20 sano.