Hay’ada WFP ayaa
waxa ay sheegtay in ay sii wadi doonto howlihii gargaar ee ay ka waday dalka
Soomaaliya kadib markii shalay Xarakada Mujaahidiinta Al Shabaab ay sheegeen in
hay’adaasi ay ka mamnuuceen in ay ka howlgasho dalka
Soomaaliya.
Afhayeenka hay’ada
Cunada Aduunka ee WFP Peter Somerton oo xalay wareysi siiyay Shabelle isagoo ku
sugan magaalada Nairobi ee xarunta wadanka Kenya ayaa waxa uu sheegay in
hay’adda WFP ay sii wadi doonto caawimaada ay u fidiso dadka barakacaaya
Soomaalida ah ee ku sugan xerooyinka ku yaala gudaha wadanka
Soomaaliya.
Waxa uu sheegay in
si walbo ee ay u suuro gal ku tahay in shaqaalahooda jooga Soomaaliya ay dadka
maatida ah gaarsiiyaan gargaarka ay u fidiso hay’adda WFP isagoo sheegay in aanu
tixgalin doonin cida maamusha goobta ay ku noolyihiin dadkaasi ay gaarsiinayaan
gargaarka bani’aadannimo.
Afhayeenka WFP Peter
Somerton ayaa waxa uu ka gaabsaday in
jawaabo badan uu ka bixiyo hadalo dhowr jeer ka soo yeeray Xarakada
Mujaahidiinta Al Shabaab oo ku aadanaa in Hay’adda WFP laga joojiyay
shaqooyinkii ay ka waday Soomaaliya.
Hasa ahaatee, Shalay
ayay aheyd markii War saxaafaadeed kii ugu dambeeyay ee ka soo baxay Xarakada
Mujaahidiinta Al Shabaab lagu mamnuucay in guud ahaanba WFP ay ka shaqeyn karin
gobolada ay gacanta ku hayaan Xarakada Al Shabaab iyadoo diginiin culus loo
jeediyay qandaraaslayaasha Soomaalida ah ee la shaqeeyay hay’adaasi tilaabo adag
ay ka qaadi doonaan Xarakada Mujaahidiinta Al Shabaab.