Ra'iisul wasaarihii xukuumadda Soomaaliya Maxamed C/llaahi
Maxamed (Famraajo) ayaa iska casilay xilkiisii kaddib cadaadis xooggan
oo kaga yimid dowladda Uganda iyo xubno uu ka mid yahay madaxweynaha
Soomaaliya Sheekh Shariif Sheekh Axmed.
Mudane
Farmaajo ayaa intii uusan iscasilin wuxuu kulammo saacado ah la yeeshay
madaxweynaha Soomaaliya iyo saraakiil ka socday Uganda iyo AMISOM oo ay
ka mid ahaayeen taliyaha guud ee ciidamada Uganda Jen. Aronda
Nyakairima iyo taliyaha cusub ee AMISOM Maj. Fredrich Mugisha.
Ra'iisul wasaarihii hore oo saxaafadda la hadlay ayaa sheegay inuu
is-casilay isagoo eegaya danaha dalka iyo dadka Soomaailyeed, isagoo
xusay inuu jecelaystay inaan tanaasulo oo uu bedelo qaabkii hore ee
midi-midi ku taagga ahaa, wuxuuna xusay inuu dalka ku sugnaan doono oo
uu la sii shaqeyn doono dowladda, balse ma uusan sheegin howsha uu
qabanayo nooceeda.
Sidoo kale, wuxuu mahad ballaaran u jeediyay ciidamada dowladda
Soomaaliya iyo shacabkii dibadbaxyada ku taageeray, isagoo xusay inuusan
illoobi doonin, isagoo si gaar ah ugu baaqay ciidamada inay howlahooda
sii wataan.
Madaxeyne Sheekh Shariif ayaa ka aqbalay iscaislaadda ra'iisul
wasaaarihi hore Farmaajo, isagoo si KMG ah xilka ugu magacaabay ra'iisul
wasaarenimo ku xigeenkii ahna wasiirkii qorsheynta iyo iskaashiga
caalamiga ah C/weli Maxamed Cali, wuxuuna si kooban ula hadlay
saxaafadda isagoo sheegay inuu aqbalay inuu xilka sii hayo.
"Aad ayaan uga xumahay in Maxamed C/llaahi uu meesha ka baxo,
waxaanse ka rajeynayaa inuu nala joogo oo uu nagu biiriyo xifraddiisa,
waana aqbalay inaan xilka sii hayo inta laga soo magacaabay ra'iisul
wasaare cusub," ayuu ra'iisul wasaaraha KMG ah ee Soomaaliya yiri.
Madaxweynaha Shariif oo isaguna goobta ka hadlay ayaa sheegay in
iscasilaadda ra'iisul wasaaraha uu soo dhaweynayo, ayna qayb ka tahay
heshiiskii Kampala lagu gaaray, isagoo ugu hambalyeynayo Farmaajo
wax-qabadkiisiii, isagoo ka dhawaajiyay inuu ku faraxsan yahay inuu
lasii shaqeeyo.
Sheekh Shariif ayaa looga fadhiyaa inuu soo magacaabo muddo laba
todobaad ku siman ra'iisul wasaare cusub oo soo dhisa xukuumad bedesha
tii Farmaajo.
Ra'iisul wasaaraha iscasilay ayaa toddobaadkii hore shir jaraa'id ku
sheegay inuusan iscasilayn inta heshiiskii Kampala ay go'aanno ka gaaro
doonaan baarlamaanka KMG ah ee Soomaaliya, wuxuuna sheegay in isaga iyo
xukuumaddiisu ay sii shaqeyn doonaan.
Taliyaha ciidamada Uganda, taliyaha AMISOM iyo saraakiil la socday
ayaa labadii maalmood ee lasoo dhaafay kulammo la lahaa ra'iisul
wasaaraha inkastoo uu dhowr jeer oo hore diiday inuu is casilo ayuu
haddana maanta si lama filaan ah isku casilay.
Mudane Farmaajo ayaa xilkan loo magacaabay bishii Oktoobar ee
sannadkii hore, kaddib markii uu khilaaf soo dhexgalay ra'iisul
wasaarihii hore Cumar C/rashiid Cali Sharma'arke iyo madaxweyne Sheekh
Shariif, iyadoo Farmaajo uu soo dhisay xukuuumad ka kooban
18-wasaaradood.