Waxaa maalintiil labaad magaalada Muqdisho ee dalka Soomaaliya ka socda
dibadbaxyo lagu taageerayo ra'iisul wasaaraha Soomaaliya Max'ed C/llaahi
Farmaajo iyo xukuumaddiisa, iyadoo dadku ay xireen qaar ka mid ah waddooyinka ku
yaalla degmooyinka ay dowladdu ka taliso.
Isgoyska KM-4 oo ah mid ka ugu mashquulka badan goobaha ay dowladdu ka taliso
ayay dibadbaxyaal careysan xireen iyagoo u diiday gaadiidku maraan, iyagoo sidoo
kale ku shiday bartamaha isgoyskaas taayarrada gaadiidka si ay u muujiyaan
cararooda.
Mudaaharaadyadan oo soo billowday shalay ayaa ka dhashay qodob ka mid ah
kuwii kasoo baxay heshiiskii ay madaxda DKMG ah ku gaareen dalka Uganda oo ahaa
in ra'iisul wasaaraha KMG ah ee Soomaaliya uu is-casilo lana kala diro
xukuumadda.
"Waxaan kasoo horjeednaa in ra'iisul wasaaraha Soomaaliya lagu qasbo inuu
xilka ka dago, waxaan doonaynaa isaga, inta go'aankaas laga laabanayana
dibadbaxyadu way soconayaan," ayay tiri haweeney waayeel ah oo ka mid ahayd
dadkii qaybta ka ahaa dibadbaxyada maanta socda.
Bannaanbaxyada maanta ayaa u muuqda kuwo ka yar kuwii shalay, balse dadka ka
qaybqaadanaya oo u badan dhallinyaro ayaa waxay ku dhawaaqayeen erayo ay ku
diidan yihiin labada Shariif, waxayna goobaha furan ku qabsbeen in la xiro.
"Ujeeddada iscasilaadda Farmaajo iyo kala diridda xukuumadda waa mid
muujinaysa inaan la doonayn nabad ka dhalata Soomaaliya," ayay HOL u sheegeen
dhowr ka mid ahaa dhallinyaradii ka qaybqaadanayay mudaaharaadka, kuwaasoo isugu
jiray rag iyo dumar.
Ra'iisul wasaaraha Soomaaliya oo dib ugu laabtay shalay magaalada Muqdisho
ayaa si kooban ula hadlay taageerayaashiisa isagoo ugu baaqay inay isdajiyaan,
balse ma uusan sheegin inuu xilka ka dagayo iyo in kale.