Hay'adda ICRC, ayaa warbixin ay maanta oo Arbaco ah soo saartay ku sheegtay, in
dagaallada ka sii socda Soomaaliya ay xaaladda kasii dareen, ayna ku qasbeen in
ka badan hal milyan oo qof inay u baahdaan gargaar bani'aadamnimo oo caalami
ah.
Warbixinta, ayaa lagu sheegay in hay'adda ICRC oo kaashanaysa hay'adda bisha
cas ee Soomaaliyeed, ay soo gabgabeeyeen gargaar ay u qaybiyeen 540,000-qof oo
ka mid ah barakcayaasha ku nool jidka isku xira Muqdisho iyo Afgooye, kuwaas oo
la siiyay raashin iyo maacuunta guryaha.
"Dagaallada ka socda Soomaaliya, muddada labaatanka sano ah, xaaladda ayay ka
dareen, waxayna sii adkeeyeen nolosha dadka," ayuu yiri madaxa guddiga ICRC ee
Soomaaliya Pascal Mauchle.
"Tobanaan kun oo shacab ah, ayaa dagaallada awgood uga barkacay Muqdisho
bilihii ugu dambeeyay. Wax-soo-saarkii beeraha hoos ayay u dhaceen, qiimaha lagu
iibsado raashinka sare ayuu u kacay, dadkuna ma heli karaan lacago ay ku gataan
waxay u baahan yihiin, xitaa haddii ay suuqyada ku arkaan. Sidoo kale xaaladda
dhaqaalaha waa mid liitada, dadkuna waxay la tacaalayaan sidii quutul-yoonkooda
ku heli lahaayeen, tanina ma ahan mid ku eg deegaannada ay dagaalladu ka jiraan,
ee waa dalka oo dhan, oo ay ku jiraan qaybaha waqooyi," ayuu Mauchle hadalkiisa
ku daray.
ICRC, ayaa warbixinteeda ku sheegtay in todobaadyadii lasoo dhaafay, in
iyadoo kaashanaysa bisha cas ee Soomaaliyeed ay siiyeen barakacayaasha tiradoodu
gaarayso 240,000 oo qof raashin isugu bariis, saliid iyo digir ay isticmaali
karaan laba bilood, baco ay ku dataan guryaha macmalka ah ee ay daggan yihiin,
sanaadiiq ay digaagado ku jiraan.
Sidoo kale, hay'addu waxay sheegtay in 300,000-qof, oo isugu jira
barakacayaal, agoon iyo haween guri-joogto ah, ay siiyeen gargaar kala duwan,
kuwaasoo ku kala nool: gobollada Shabeellada hoose, Gedo, Bakool iyo Bay oo ku
yaalla koonfurta Soomaaliya, Hiiraan iyo Mudug oo bartamaha ku yaalla iyo
Puntland.